Қомызшы қонақ

Қомызшы қонақ

Жуырда университетіміздің «Музыка және өнер» кафедрасы  студенттеріне Қырғыз Республикасының халық әртісі, Токтогул атындағы қырғыз мемлекеттік премиясының иегері, шебер қомызшы, дəстүрлі əнші, өнертану докторы  Роза Аманова шеберлік сағаттарын өткізді.

Ол қазіргі жаһандану кезеңінде дəстүрлі өнердің жанашырлары мен тындармандары азайып бара жатқандығын, оның алтын арқауын үзбеу жастардың парызы екендігін тебіреніспен айтты. Қырғыз елінің дəстүрлі музыка өнерін дүние жүзіне насихаттаушы Роза Аманова домбыра мен қомыз аспаптарының орындау тәсілдеріндегі ұқсастықтар мен айырмашылықтарды түсіндіре келе, қырғыз күй-аңыздарынан тың мəліметтерді әңгімеледі. Ол өз ғылыми ізденістерінің нәтижесінде тапқан қомыз күйлеріндегі оң қолдың қағысындағы 28 түрлі ойнау тәсілінің бірқатарын орындап көрсетті.

Роза Аманова қырғыз әйелдерінен шыққан тұңғыш дастаншы. Кездесу барысында әнші қырғыз дәстүрлі шығармаларын және өзі шығарған бірнеше әндерінің арасындағы екі елге кең танымал болған «Мен сені сағынғым келеді» әнін орындап берді.

«Ұлт мəдинетінде дəстүрлі əннің маңызы зор, сондықтан да оны жоғалтпай, келешекке мұра етіп қалдыру міндетім» - дейді əнші. Кездесу соңында Роза Аманова естелік ретінде кафедра ұжымына жеке орындауындағы ән-альбомдар топтамасын сыйға тарту етті.

Жастардың бойына ғылым, білім мен сабақтасқан терең ойлы тектілік пен кемелді кісілік, адами асыл қасиеттер сіңіруге септігін тигізетін осындай кездесулер көп болғай.

 

 

Ақниет ПАШАЕВА,
«Дәстүрлі музыка өнері» мамандығының 1-курс студенті

ПІКІРЛЕР

Тізімге қайта оралу

ҚОНАҚ ДӘРІСІ

27 Ноя 2020 15