Жәрмеңке жас мамандарды жұмыспен қамтуға арналды
Өткен апта соңында Х.Досмұхамедов атындағы Атырау мемлекеттік университетінде «Жас маман - 2018» жәрмеңкесі өтті.
Атырау мемлекеттік университетінен 2018 жылы күндізгі оқыту нысаны бойынша – 654 түлек, сырттай оқыту нысаны бойынша – 120 түлек және кешкі оқыту нысаны бойынша – 813 түлек, барлығы 1587 түлек түлеп ұшпақ.
Атап айтар болсақ, білім бағытындағы 19 мамандық бойынша 249, гуманитарлық бағыт бойынша 45, құқық бағыты бойынша 126, өнер бағыты бойынша 28, әлеуметтік ғылымдар және экономика бағыты бойынша 125, жаратылыстану бағыты бойынша 36, техникалық ғылымдар бағыты бойынша 32, ауылшаруашылық ғылымдар бағыты бойынша 11, қызмет бағыты бойынша 2 түлек бітірмек.
Университетті бітіруші түлектерді жұмыспен қамтуға бағытталған жәрмеңке университетіміздің №1 оқу ғимаратының акт залында, №4 оқу ғимаратының ІSPACE және Бас оқу ғимаратының English Only Space залдарында өтті.
Шараға 180 мекеме-кәсіпорындар өкілдері шақырылып, оның 147-сі қатынасты. Олар: Атырау облысы Білім басқармасы және қалалық, аудандық білім бөлімдері, Атырау облысы Ішкі істер департаменті, Атырау облысы прокуратурасы, Атырау облысы адвокаттар алқасы, Атырау облыстық әкімшілік аппаратының кадр бөлімі, Казкоммерцбанк, Нұрбанк, АТФ банк, Цесна банк, КазМұнай Газ өнімдері, Атамекен кәсіпкерлер палатасы және т.б.
Жәрмеңке нәтижесінде алдын ала талдау бойынша күндізгі бөлімді бітіруші түлектердің 80 пайызы жұмыспен қамтылып отыр. Сырттай және кешкі оқыту нысандарының түлектері бәрі жұмыс жасайды.
Маманды жұмысқа жіберу, өз бетімен жұмысқа орналасу құқығын беру, мемлекеттік білім беру тапсырысы негізінде білім алған азаматтарды жұмысын өтеу жөніндегі міндетінен босату немесе олардың міндетін тоқтату қағидаларына сәйкес педагогикалық мамандықтарды білім гранты негізінде және ауылдық квота шеңберінде бітірген түлектер жоғары оқу орнын бітіргеннен кейін кемінде үш жыл ауылда, кентте, ауылдық округте орналасқан тиісті мемлекеттік білім беру ұйымдарында жұмысты өтейді.
Биыл білім гранты бойынша педагогикалық мамандықтарды бітіретін түлектердің саны – 18 болса, оның 16-сы жұмысқа орналасып отыр, ал ауыл квотасы шеңберінде бітіретін 5 түлектін барлығы жұмыспен қамтылды.
ПІКІРЛЕР