Ұрпақтар сабақтастығы

10 қыркүйек күні университетіміздің акт залында «Мәңгілік ел» ғылыми-зерттеу орталығының ұйымдастырған, ардагер ұстаз, белгілі өлкетанушы Зәки Ахмеджанұлының «Беріш-Себек шежіресі» атты кітабының тұсаукесер рәсімі өтті. Шараны жүргізген Алпатанов Сергей: «Өткенімізді білмей,  болашаққа ұмтылу мүмкін емес.

Сондықтан «жеті атасын білген ұл - жеті жұрттың қамын жер» деген ұлағатты сөз бүгінде арамызда жалғасын табуда»,-деп жиынның шымылдығын ашқан болатын. Елбасымыздың «Болашаққа бағдар: рухани жаңғыру» мақаласындағы жалпыұлттық патриотизмнің нағыз өзегіне айналған «Туған жер» бағдарламасына сай өткізілген бұл шараның негізгі мақсаты: руға бөліну емес, Беріш-Себек руының ұрпақтарының басын қосып, ата-бабаларды ұмытпай, рухтарын ұлықтап, жеті атаны туыс-бауырларға таныту. Шежіре кітапта Беріш-Себек руының аталықтарының бұрыннан белгілі-белгісіз ұл-қыздарының аттары жазылған. Кітап негізінен, халқына қамқор, ұрпағына мақтаныш болған, сол кездегі бауырластарды, билер мен батырларды, қоғам қайраткерлерін, туған жердің асылдарын, бүгінгі күндегі ұрпақтарын танып, білуге деген мақсатта жарық көрген. Кітаптың авторы Зәки Ахмеджанов: «Бүгін міне, сіздердің алдарыңызда менің арманым орындалуда. Бірнеше жылдан бергі ізденісіміздің нәтижесі бүгін көрінуде. Аталарымызды, я болмаса рудың қай бөлімінен екенін білмейтіндер болса осы шежіре кітапты оқыңыздар, танысыңыздар».- деген болатын өз сөзінде. Сондай-ақ Зәки ағамыз, шежіре-кітап әр отбасының асыл бұйымына айналып, ұрпақтан-ұрпаққа жетсе мақсаттың орындалғаны деп біледі.                           

Малика ТАКЕЖАНОВА,

журналистика мамандығының 2-курс студенті

ПІКІРЛЕР

Тізімге қайта оралу

ҚҰТТЫҚТАЙМЫЗ!

23 Окт 2020 19