«Қазіргі таңдағы физиканы оқытудың өзекті мәселелері» атты онлайн семинар
2017 жылдың 10 - шы қазан күні Х.Досмұхамедов атындағы Атырау мемлекеттік университеті мен Ы.Алтынсарин атындағы Арқалық мемлекеттік педагогикалық институты арасында бірлескен «Қазіргі таңдағы физиканы оқытудың өзекті мәселелері» атты онлайн семинар өтті.
Семинар барысында келесі мәселелер қамтылды:
- Физиканы ағылшын тілінде оқытудың әдіс тәсілдері;
- Оқу үшін бағалау және оқытуды бағалау;
- Оқыту мен оқудағы жаңа әдіс-тәсілдер;
- Роботты техниканы оқу үрдісіне енгізу;
- Физикалық білім беруде «Kahoot» бағдарламасын қолдану;
- Физика сабағындағы білім алушылардың білімін ақпараттық энтропия әдісімен бағалау.
Физика және техникалық пәндер кафедрасының меңгерушісі п.ғ.к., доцент Сырбаева Ш.Ж., магистр, оқытушы Г.Мырзагерейқызы бүгінгі таңдағы физиканы оқытудың жаңа әдіс - тәсілдері туралы өз ойларын ортаға салды. Сонымен қатар п.ғ.д., профессор Имашев Ғ.И. келесі мәселелерге тоқталып өтті: Қазақстанда соңғы уақытта Кенбридж бағдарламасы бойынша жеті модуль, соның ішінде сіздер айтқан негізгі мәселелер, жаңа тәсілдер, бағалау әдістері және басқа да мәселелер жүзеге асырылып жатыр.
Дегенмен де, ақпараттық технологиялар жағдайында көптеген нәрселерге көңіл бөлуге болады. Бірақ, бұл жерде бұрынғы дәстүрлі әдістерді де ұмытпау керек. Жаңа айтылған бағалау әдісі бұрынан да бар, әрине технологиялық жетістіктерге байланысты жетілдіру қажет екені айдан анық. Ол жөнінде Елбасының алға қойып отырған тапсырмаларын - жеке пәнді оқытудағы, оның ішінде техникалық пәндерді оқытуды негізгі өндіріспен байланыстыруды, яғни ақпараттық технологиялар, үкіметтің айналысып жатырған сандық технологиялар мәселелерін басты назарда ұстауымыз керек, деп есептеймін.
Жаңа технологиялардың түрлері де, әдістері де көп, соған байланысты өздеріңіз айтқан Назарбаев зияткерлік мектептеріндегі іс-тәжірбиені басшылыққа алуға болады. Бірақ, физика пәнінің өз ерекшеліктері де бар. Ол ерекшеліктер өздеріңізге белгілі. Ешқандай экспериментсіз, ешқандай тәжірбиесіз физикадан нақты білім бере алмаймыз, іскерлікті, дағдыны қалыптастыра алмаймыз. Олай болса физикалық зертханалардың материалдық базасына жақсы көңіл бөлінуі тиіс. Бүгінде жүзден аса жаңа технологиялар бар олардың әрқайсысын саралап, қайсысы пайдалы десеңіз, дөп басып айта алмаймыз. Бірақ, меніңше физикаға тән - проблемалық әдіс деп есептеймін. Проблемалық әдістерді теорияда да, тәжірбиеде де, экспериментте де пайдалануға болады. Біз алған білімімізді күнделікті өмірде қолдануымыз керек, дей келе алдағы уақытта кафедра аралық байланысты жолға қойып, дәстүрлі түрде жалғастырайық деп тілек білдірді.
ПІКІРЛЕР