Атырау университетінің LibAU электронды кітапханасы іске қосылды
Х.Досмұхамедов атындағы Атырау университетінің ғылыми кітапханасының автоматтандырылған ақпараттық жүйесінің таныстырылымы өтті.
Іс-шараға университеттің профессор-оқытушылар құрамы, студенттер, сондай-ақ Атырау облыстық білім беру мекемелері мен Ғ.Сланов атындағы Атырау облыстық ғылыми әмбебап кітапханасының өкілдері қатысты. Қатысушылар электронды кітапхананың мүмкіндіктерімен танысып, жаңа платформаның артықшылықтарын жоғары бағалады.
Жоба мақсаты - білім мен ғылымға қолжетімділікті арттыру, зерттеушілер мен студенттерге заманауи ақпараттық ресурстарды ұсыну. Жоба авторлары PhD доктор, қауымдастырылған профессор Қаламқас Багитова, қауымдастырылған профессор Ғалия Салтанова, аға оқытушылар Гүлзада Дашева мен Малика Шангитова, IT бөлім қызметкері Ришат Рашитов сайт құрастыруды 3 кезеңге жоспарлап, 2024 жылдың наурыз-желтоқсан айлары алғашқы «платформа» кезеңін аяқтады. Электронды кітапханаға ғылыми деректер базасы, оқулықтар, монографиялар, мақалалар мен зерттеулер жинақталуда. Сонымен қатар оқытушылар мен білім алушыларға іздеу жүйелері, библиографиялық анықтамалар мен цифрлық құралдар жасақталды.
««Білім инемен құдық қазғандай» демекші, дамыған технологиялар заманында кітаптан алшақтап кеттік. Ғылыми электронды кітапхана жобасы арқылы кітаппен қайта қауышқандаймыз. Кітап іздеу - әр білім алушының девизі болуы қажет», - деді құттықтау сөзінде Атырау университеті директорлар кеңесінің төрағасы Бейбіт Мамраев.
Таныстырылым барысында университет басшылығы электронды кітапхана қызметін қолданушылардың ғылыми-зерттеу жұмыстарын жазу барысын жеңілдетіп, тез әрі сапалы білім алуына үлкен серпін беретініне және облыс деңгейіндегі маңызды жоба болатынына сенім білдірді.
Х.Досмұхамедов атындағы Атырау университетінің бұл бастамасы - өңірдегі цифрлық білім беру ресурстарын дамытуға бағытталған маңызды қадамның бірі!
ПІКІРЛЕР