Цифрландыру дәуіріндегі қылмыстық істердің өзекті мәселелері талқыланды
Х.Досмұхамедов атындағы Атырау университетінде Атырау облысы полиция департаментінің мамандарымен кездесу өтті.
Университеттің Заң клинкасы ұйымдастырған іс-шараның мақсаты - қазіргі кибер қылмыстардың өршуіне байланысты білім алушыларды заманауи қылмыс түрлері мен интернет алаяқтықтан сақтану шараларымен ақпараттандыру, Ішкі істер органдарына қызметке орналасу жолдарымен таныстыру.
Жиында Атырау облысы полиция департаментінің тәрбие және кадр жұмысы басқармасының бастығы, полиция подполковнигі Нұржан Шаеденов, тергеу басқармасының кибер қылмыстарды тергеу бөлімінің бастығы, полиция подполковнигі Мұратбай Кадиров, жедел-криминалистикалық басқарма бастығының орынбасары, полиция полковнигі Болатбек Мендигалиев, криминалист, полиция майоры Жардем Тагаев құқықтану, биология және IT білім бағдарламаларының студенттеріне полиция басқармасында атқарылатын жұмыстарды таныстырып, баяндамалар жасады.
«21 жыл бұрынғы Атырау университетінің түлегі, қазіргі мемлекеттік қызметкер ретінде студенттермен кездесіп отырғаныма қуаныштымын. Атырау облысы Полиция департаменті мен Атырау университетінің Экономика және құқық факультеті арасында ынтымақтастық меморандумына қол қойылған. Заң факультетінің және биология, IT мамандықтарының студенттерін полиция департаментінде жұмыс жасауға шақырамыз», - деп полиция қызметкері ретінде жұмыс жасаудың артықшылықтарымен бөлісті полиция подполковнигі Нұржан Шаеденов.
Сонымен қатар, кездесуде Тергеу басқармасының кибер қылмыстарды тергеу бөлімінің бастығы Мұратбай Кадиров кибер қылмыстардың түрлері мен интернет алаяқтықтан қорғанудың жолдары туралы баяндама жасады. «Өткен жылы 19 мың кибер қылмыстық іс тіркелді. Сол істерді тергеп-тексеру барысында интернет арқылы жасалатын қылмыстың 8 түрі анықталды: тегін жарнама сайттары, банк шоттары, Anydesk, инвестиция, фишинг, жасанды интеллект арқылы», - дейді полиция подполковнигі.
Жиында интернет құқықбұзушылықтардың алдын алу, биология және IT мамандарының криминалист ретінде жұмысқа орналасу мүмкіндіктері, «кибер-криминалист» жаңа мамандығың артықшылықтары жөнінде ашық пікірталас өрбіді.
Кездесу соңында университет оқытушылары полиция департаментінде ашық есік күнін ұйымдастыруды ұсынып, естелік суретке түсті.
ПІКІРЛЕР