- Басты бет
- МЕДИА-РЕСУРСТАР
- Жаңалықтар
- Ұлы Жеңістің 80 жылдығына арналған іс-шаралар топтамасының ашылу салтанаты өтті
Ұлы Жеңістің 80 жылдығына арналған іс-шаралар топтамасының ашылу салтанаты өтті

Х.Досмұхамедов атындағы Атырау университетінде Ұлы Отан соғысындағы жеңістің 80 жылдығына арналған іс-шаралар топтамасының ашылу салтанаты өтті.
Тыл ардагерлері, жергілікті атқарушы және өкілді билік органдарының өкілдері, қоғам белсенділері мен студент жастар қатысуымен өткен жиын «День победы» әнін орындаумен басталып, Ұлы Жеңіске жету жолындағы ауыр кезеңдер мен батырлар ерлігі сөз етіліп, бейнеролик те көрсетілді.
Қазақстан Халық партиясының ұйымдастыруымен өткізілген тақырыптық іс-шаралардың негізгі мақсаты - өскелең ұрпақтың Отанға деген сүйіспеншілігін арттырып, тәрбиелеу.
«Бүгін салтанатты шараға жиналғандар мен іс-шаралар кешенің алдағы жиындарына қатысатын барша жанға зор алғысымды білдіргім келеді. Бәріміз бірлесе отырып, биылғы жылды қазақстандықтар үшін мәнді әрі есте қаларлықтай етіп өткізуге ат салысайық. Атырау облысы бойынша Ұлы Отан соғысына аттанғандар 51013 адам, оның ішінде оралғандар - 6503, із-түссіз жоғалғандар - 3365, қаға болғандар - 6917. Тыл ардагерлері бойынша мәліметтерге сүйенсек, Атырау облысы бойынша - 2487 адам, қазіргі кезде өмірден өткендер саны - 1807, қазіргі кезде бары - 680 адам. ҰОС-ында Атырау облысынан 14 адам «Халық Қаһарманы», Кеңес Одағының батыры және Даңқ Орденінің толық иегерлері болған еді»,- дей келе, қатысушыларды Ұлы Жеңістің 80 жылдық мерейтойына арналған барлық іс-шараға белсенді қатысуға шақырды Қазақстан Халық партиясының Атырау облыстық филиалының төрағасы Балжан Ибатқызы.
Жиын барысында Облыстық ардагерлер кеңесінің төрағасы Мұрат Өтешов, Қазақстан Халық партиясының маңызды бастамаларына қолдау көрсетіп жүрген мәслихат өкілі Гүлнафия Танбаева, Атырау облысының құрметті азаматы, профессор Қадыр Жүсіп, Каспий маңы академиясының академигі Шахман Нағымов сөз сөйлеп, ойларын ортаға салды.
«Жер шарын екіге бөліп жіберердей фашистік Германия шабуылдаған Ұлы Отан соғысы - ешкімнің есінен кетпейтіндей ауыр соғыс. Сол сұрапыл соғыстың бас жағын көрген бала едім ол кезде... Соғыстан бұрын туғандардың бірі - менмін. Соғыс басталғанда Сталинградта болып жатқан майданнан Батыс Қазақстанға, Маңғыстауға, Ақтөбеге, Гурьевке (Атырау) 500-дің үстінде неміс ұшақтары барлау үшін ұшып келді. Сол келудің астарында «Қазақстанның бұл өңірі жаулап алуға тұрарлық па?», «болашағы қандай?» деген секілді үлкен сұрақтар жатты»,- деп, сұрапыл жылдардағы естеліктерімен бөлісті филология ғылымдарының докторы, профессор Қадыр Өтегенұлы.
Салтанатты жиынға Ұлы Отан соғысының құрбаны Сүлеймен Ысқақұлының немересі Алия Мұстафақызы мен Кеңес одағының батыры Қайырғали Смағұловтың немерелері Раул Исмагулов және Қуаныш Исмагулов қатысып, аталары туралы жылы естеліктерімен бөлісті.
Жиын соңында қатысушылар батырларымыздың ерлігін құрметтеп, рухына тағзым етудің белгісі ретінде қаза тапқандарды бір минут үнсіздікпен еске алды.
ПІКІРЛЕР