Атырау университеті мен ҚазҰУ арасындағы ынтымақтастық бастама
Х.Досмұхамедов атындағы Атырау университетінде «Білім берудің цифрлық дәуірі: медиасауаттылық және тұрақты дамуға арналған инновациялық әдістер» атты біліктілікті арттыру курсы өтті.
Кадрларды қайта даярлау және біліктілікті арттыру кеңсесінің жетекшісі Гүлжан Нұрсұлтанова мен Шетел тілін оқыту әдістемесі кафедрасының меңгерушісі, п.ғ.к. Элеонора Абдол ұйымдастырған курсты әл-Фараби атындағы ҚазҰУ түркітану және тіл теориясы кафедрасының п.ғ.к.,қауымдастырылған профессоры Перизат Елубаева жүргізді.
Курстың мақсаты - «Қазақстан жастарының әлеуметтенуі мен мәдениаралық қатысымының негізгі факторы ретінде медиасауаттылығын қалыптастыру мақсатында тілдік және медиабілім беруді интеграциялау әдістемесі (AP19680048)» атты ғылыми жобаның күнтізбелік жоспарын жүзеге асыру шеңберінде тіл және медиабілім беру интеграциясы бойынша ПОҚ-ның біліктілігін арттыру.
Дәріскер қатысушыларды әлеуметтік желілердегі ақпаратты сыни тұрғыдан талдауға, тексерілмеген мазмұнға соқыр сенім артуға жол бермеуге және цифрлық сауаттылықты, соның ішінде интернетті қауіпсіз пайдалануды және жеке деректерді қорғау дағдыларын жетілдіруге шақырды. Курста білім беруде жасанды интеллект құралдарын пайдалану бойынша практикалық сабақтар өткізілді, онда ЖИ оқыту процесін тиімді етуге, оқу барысын жетілдіруге және медиасауаттылықты дамытуға қалай ықпал ететіні көрсетілді. Сонымен қатар медиасауаттылықтың уақыт өте келе дамып, тұрақты тәжірибе арқылы қалыптасатыны және заманауи ЖИ құралдарын интеграциялау арқылы айтарлықтай жақсартуға болатынын ерекше атап көрсетті.
Біліктілікті арттыру курсы - екі ЖОО арасындағы академиялық және ғылыми байланыстарды нығайтып қана қоймай, бірлескен жобаларды жүзеге асыруға зор ықпал етіп, өзіндік тәжірибе алмасу, ақпарат алмасу, медиа және цифрлық сауаттылыққа терең, сыни түрде қөзқарас дамып, жоғары деңгейде коллаборативті орта құрудың бастамасы болды.
ПІКІРЛЕР