Полиция өкілі құқықтық тәртіп туралы дәріс өткізді
Х.Досмұхамедов атындағы Атырау университетінде «Жастар және құқықтық тәртіп» тақырыбында қонақ дәріс өтті.
Экономика және құқық факультетінің оқытушылары мен студенттері қатысқан шарада Атырау облысы Есірткі қылмысына қарсы іс-қимыл басқармасының аға жедел уәкілі Марьяна Жанғалиева жасөспірімдер мен жастар арасындағы нашақорлық пен есірткі тасымалдаудың Қазақстанның болашағына теріс әсер етуші мәселе екендігін баяндап, толымды ақпараттарымен бөлісті.
«Есірткіні қолдану мен тасымалдау - тұтас қоғамды алаңдатып жүрген өзекті тақырып. Осы мәселе төңірегінде мемлекеттік органдар, тіпті, блогерлер мен қоғам белсенділері жыл сайын іргелі жұмыстар атқарып келеді. Бұл – ең алдымен, ұлт денсаулығына қарсы қылмыс. Індетпен тұтас қоғам болып күресуіміз керек»,- деді дәріскер Марьяна Жанғалиева.
Дәрісте құқықтық тәртіп мәселесі мен заңдағы өзгерістер, адамдардың денсаулық тұрғысынан ғана емес рухани, психологиялық азуға ұшырайтыны, сондай-ақ жастардың есірткіні қолдану немесе оларды тасымалдау істеріне қалай арбалып қалатыны ситуациялық, практикалық кейстік жағдайлармен баяндалып, бейнеролик көрсетілді. Білім алушылар өзекті сұрақтарын қойып, ашық пікірталас өрбіді.
«Атырау облысының әкімдігі мен полиция департаментінің ұйымдастыруымен өткен ауқымды форумға қатысқан болатынмын. Форумдағы баяндамалардан түйгенім - нашақорлыққа негізінен жасөспірімдер мен жастардың әсер ететіндігі. «Тәрбие тал бесіктен» демекші, ата-аналар, педагогтар мен жұртшылық нашақорлықтың алдын алу бойынша бірлескен жұмыс жүргізуі тиіс деп ойлаймын. Мемлекеттің қолдауымен жастар арасында індетті алдын алуға атсалысатын ұйым құрып, біріккен жұмыстар атқарылса»,- деп ұсыныс білдірді құқықтану мамандығының 2-курс студенті Бисембаева Нұрбибі.
Кинологиялық қызмет орталығының мамандары есірткі заттарын анықтаудағы қызметтік иттің жұмысы туралы практикалық көрініс өткізіп, қызметтік иттердің есірткі затын табудағы маңызын дәлелдеп берді.
Кездесу соңында студенттер мазмұнды дәріс өткізген полиция подполковнигі Марьяна Жанғалиеваға ризашылығын білдіріп, естелік суретке түсті.
ПІКІРЛЕР