Қазақстанның халық жазушысы Зейнолла Қабдоловтың туғанына – 97 жыл!
Х.Досмұхамедов атындағы Атырау университетінде Қазақстанның халық жазушысы, профессор Зейнолла Қабдоловтың туған күніне арналған ғылыми семинар өтті.
Қазақ тілі мен әдебиеті кафедрасының оқытушы-профессорлары мен студенттері қатысқан шарада профессор Зейнолла Қабдоловтың 97 жылдығы аталып өтіп, ғалымның өнегелі өмірі мен ғылыми-шығармашылық ізденістері, «әдебиет сынды ар ісінің» алдындағы абыройлы қызметі жөнінде сөз қозғалды.
Ұлттық Ғылым академиясының академигі Зейнолла Қабдолұлы - филология ғылымының докторы, профессор, ҚР Мемлекеттік сыйлығының лауреаты. Ол саналы ғұмырын қазақ әдебиетінің теориясын негіздеуге арнады. Сондай-ақ ғалым Х.Досмұхамедов атындағы Атырау университетінде де бірнеше жыл қызмет атқарып, шәкірт тәрбиеледі.
Танымды шарада университеттің ардагер ұстазы, профессор, ақын Қадыр Өтегенұлы ғалымның өмірдерегінен сыр шертіп, профессордың М.Әуезовпен танысуы, шығармашылық белестері, қаламгердің жазу стилі жөнінде баяндама жасап, білім алушыларды ғылыммен айналысуға шақырды. «Желтоқсан айы- біз үшін қасиетті ай. Бұл айды - ұлылардың айы деп есептеймін. Себебі, бұл айда Әбіш Кекілбаев, Зейнолла Қабдолов, Фариза Оңғарсынова, Шыңғыс Айтматов сынды тұлғалар туылған. Соның ішінде 12 желтоқсанда барлығымыздың ұстазымыз, Атыраудың тумасы, ірі ғалым, жазушы Зейнолла Қабдолов дүниеге келді. Қазақ сөз өнерін теориялық жағынан жасақтап берген тұлғаны сіздер білулеріңіз керек»,- деді профессор Қадыр Өтегенұлы.
Ғылыми жиын соңында Көптілді білім беру факультетінің деканы Меруерт Аманғазиева қорытынды сөз сөйлеп, қатысушыларға алғысын білдірді.
ПІКІРЛЕР