«ҚЫПШАҚ ҚОҢЫР» КІТАБЫ ОҚЫРМАНҒА ЖОЛ ТАРТТЫ
Х.Досмұхамедов атындағы Атырау университетінде белгілі түркітанушы, мәдениет қайраткері, Мажарстан ғалымы Қоңыр Иштван Мандокидің 80 жылдығына арналған ақын, жазушы Маржан Ершудің «ҚЫПШАҚ ҚОҢЫР» атты кітабының тұсаукесер рәсімі ұйымдастырылды.
Қазақ-мадияр халықтарына ортақ тарихи тұлға жөнінде тың туындыны оқырмандарға таныстыру мақсатындағы іс-шараны университеттің басқарма төрағасы – ректор Саламат Идрисов ашып беріп, Қоңыр Мандокидың сан қырлы тұлға, соның ішінде түркі халықтарының басын біріктіру үшін саналы ғұмырын ғылым және руханият жолына сарп еткен қайраткер екендігін атап өтті.
Жиында Көптілді білім беру факультетінің деканы, ф.ғ.к., қауымдастырылған профессор Меруерт Аманғазиева модератор болып, Қоңырдың қазақ халқымен рухани жақындығы, байланысы жөнінде әңгіме өрбітті.
Тұсаукесер рәсіміне ғалымның өмірлік жары, Атырау өңірінің тумасы, Х.Досмұхамедов атындағы Атырау университетінің құрметті профессоры Оңайша Мандоки Мақсымқызы арнайы келіп, студент жастарды Қоңыр Мандоки секілді өз тіліне, тарихына, мәдениетіне құрметпен қарауға шақырды.
Ал автор Маржан Ершу қонақтарға бұл еңбекті жазуға қалай дайындалғандығы жөнінде айтып, Қоңыр өмірі мен шығармашылығына қатысты кейбір деректерді келтіре кетті.
Кітаптың лентасын Оңайша Мандоки, облыстық ардагерлер кеңесінің төрағасы Мұрат Өтешов және п.ғ.д., Атырау облысының Құрметті азаматы Асхат Иманғалиев қиып, оқырмандарға үлестірді.
Іс-шара соңында ардагерлер кеңесінің төрағасы Мұрат Сақтайұлы ғалымның жұбайы Оңайша Мақсымқызын Сұлтан Бейбарыс атындағы медальмен, Маржан Ершуды Махамбет атындағы медальмен марапаттады.
ПІКІРЛЕР