ИРАН ЕЛШІЛЕРІ АТЫРАУ УНИВЕРСИТЕТІНЕ КЕЛДІ
Х. Досмұхамедов атындағы Атырау университетіне Иран Ислам Республикасының Төтенше және Өкілетті елшісі Али Акбар Джоукар және Бас консулы Ғоламреза Хашем бастаған арнайы делегация келіп, оқу орнының тынысымен танысты.
Кездесуге университеттің профессор-оқытушылары және Атырау облысы әкімдігінің өкілдері қатысты.
Ғылым және халықаралық байланыстар жөніндегі проректоры Қ.Өтепқалиеваның айтуынша, Атырау университеті Иранның бірнеше университеттерімен әріптестік байланыс орнатқан.
«2017 жылы Халел Досмұхамедов атындағы Атырау университетінің базасында Иран мәдениеті мен тілі орталығы ашылды. Қазір ол жерде Иран университеттерінен шақыртылған оқытушылар, Атырау университетінің профессорлық-оқытушылық құрамына парсы тілінен сабақ береді», - деді проректор.
Иран елшілері қазір екі елдің оқу орындары арасындағы интеграциялық байланыстың күшейіп келе жатқанын алға тартып, білім беру және студенттер алмасу саласындағы ынтымақтастықтың келешегіне тоқталды.
«Атырау университетінің базасында парсы тілі курстарын ұйымдастыруға және Иранистика аудиториясын ашуға, оқу құралдарымен, қажетті жабдықтармен қамтамасыз етуге барлық жағдайды жасауға дайынбыз. Алға қарай да достық қарым-қатынас пен іскерлік әріптестіктің нығая түсетініне сенімдіміз», - деді дипломат.
Жалпы Иран Ислам Республикасымен тұрақты байланыс 2017 жылдан бастап Каспий маңы елдерінің мемлекеттік университеттері ассоциациясы аясында қарқынды дамып келеді. Оның дәлелі Атырау университеті Иранның бірқатар оқу орындарымен тығыз қарым-қатынаста.
Олардың ішінде – Сари ауылшаруашылығы ғылымдары және табиғи ресурстар универститеті;
Мазандаран универститеті;
Имам Хомейни атындағы халықаралық университеті;
Байбол Ноширвани атындағы технологиялық университеті.
ПІКІРЛЕР