Х.Досмұхамедов универститетінде француз тілі тереңдетіп оқытылады

Х.Досмұхамедов атындағы Атырау университетінде Қазақстандағы Франция елшілігінің білім саласындағы ынтымақтастық бойынша атташесі Ксавье Торивелек, Сорбонна-Қазақстан институты директоры Анес Бусес, Шарль де Голль атындағы «Мирас» халықаралық мектебінің директоры Вероника Анес-Бродбент және Пуатье университетінің Орталық Азиядағы координаторы Личия Баджинидің қатысуымен онлайн кездесу өтті.

Кездесу мақсаты – 2024-2025 оқу жылынан бастап Х.Досмұхамедов университетіндегі «Шет тілі: екі шет тілі» мамандығы студентетрі үшін бірінші шетел тілі ретінде француз тілін оқытудың мән-жайын талқылау.

Кездесуде университеттің басқарма төрағасы-ректоры Саламат Идрисов Қазақстандағы Франция елшілігіне француз тілін оқытуда көрсетіп отырған қолдаулары үшін ризашылық білдіріп, бұған дейін университетте екінші шет тілі болып оқытылып келген француз тілінің бірінші шет тілі деңгейінде оқытылуының маңызы жоғары екендігін атап өтті.

Бұдан бөлек, университеттің басқа да студенттері француз тілін оқуға мүмкіндік алды. Ол үшін университет тарапынан тілді меңгеруге барлық мүмкіндік жасалады.

Кездесу барысында француз елшілігінің атташесі Ксавье Торивелек студенттерді жаңа оқу жылымен құттықтап, тіл үйренушілерге елшілік жанынан әрқашан көмек болатындығын, студенттер мен оқытушыларға Франция университеттерінде тағылымдамалардан өтуге мүмкіндік жасалатынын айтты. Әсіресе экономика, құқық, математика, физика мамандықтары студенттері француз тілін меңгерген жағдайда грантпен оқуға болатындығын да атап өтті.

Қазақстандағы Франция елшісі Сильван Гиогенің айтуынша, француз тілін үйренушілерді қажетті оқулықтармен қамтамасыз ету мақсатында жақын арада оқулықтар жеткізілмек.

Кездесуде Пуатье университетінің Орталық Азия университетінің координаторы Личия Баджини, Сорбонна-Қазақстан институтының директоры Анес Бусес, Назарбаев зияткерлік мектебінің директоры Ерғали Бижанов өз пікірлерін білдірді.

Шарль де Голль атындағы «Мирас» халықаралық мектебінің директоры Вероника Анес-Бродбен видео құттықтауын жолдады.

Тізімге қайта оралу