Х.Досмұхамедов атындағы Атырау университетінде «Адалдық сағаты» өтті

Х.Досмұхамедов атындағы Атырау университетінің оқытушы-профессорлары мен студенттеріне, Сыбайлас жемқорлыққа қарсы іс-қимыл департаменті басшылығының қатысуымен «Адалдық сағаты» өткізілді.

Іс-шараның мақсаты - жас ұрпақ арасында сыбайлас жемқорлыққа мүлдем төзбеушілікті қалыптастыру және оларға адамгершілік құндылықтарды сіңіру.

Кездесуді университеттің Басқарма басшысы-ректоры Саламат Идрисов алғысөзбен ашып, мейманға өз ризашылығын білдірді. Мемлекет басшысының аса мән беріп отырған мәселесі – сыбайлас жемқорлықпен күрес екенін атап, бұл істердің жүйелі жүргізіліп келе жатқанын айтты.

-Атырау университетінде сыбайлас жемқорлыққа қарсы мәдениетті қалыптастыруға басты назар аударылады. Барлық мамандықтарға «Сыбайлас жемқорлыққа қарсы мәдениет негіздері» пәні өткізіледі. Сонымен қатар, 2021 жылдан бері университетте сыбайлас жемқорлық тәуекелдерінің алдын алу, жол бермеу мақсатындағы комплеанс-офицер қызметі құрылды. Университеттің сыбайлас жемқорлыққа қарсы «ANTICORRUP ASU» бағдарламасы енгізілді, – деді С. Идрисов.

Өз кезегінде Ерұлан Серікқалиев департамент тарапынан атқарылып жатқан жұмыстарға және сыбайлас жемқорлыққа қарсы саясаттың 2022-2026 жылдарға арналған тұжырымдамасына тоқталды. Сонымен қатар, жастар бойында сыбайлас жемқорлыққа қарсы иммунитет қалыптастыруда университеттің маңызы зор екенін атап өтті.

-Білім беру ұйымдары өскелең ұрпақтың тек білімді әрі тәрбиелі болуына ғана емес, сонымен қатар адал, парасатты әрі саналы азамат ретінде қалыптасуына жұмыс жасайтын болады. Яғни, білімді, тәрбиелі әрі адал ұрпақтан, елінің ертеңін ойлайтын, жемқорлыққа жиіркене қарайтын, елінің дамуына үлес қосатын нағыз патриот тұлға қалыптасатын болады, – деді ведомство басшысы.

Жиын соңында оқытушы-профессорлар мен студенттер өз ойларымен бөлісіп, көкейдегі сұрақтарын қойып, тұшымды жауап алды.

Тізімге қайта оралу