11.09.2024 131

Х.Досмұхамедов атындағы Атырау университетінде «Samsung Electronics Central Eurasia» компаниясымен бірілескен, әлемнің бірқатар елінде жүзеге асқан «Samsung Innovation Campus» жобасының тұсау кесер салтанаты өтті. 
Жаңа жасақталған ІТ орталықтың ашылуына Басқарма төрағасы-ректоры Саламат Идрисов пен «Samsung Electronics Central Eurasia» компаниясы Басқарма төрағасының орынбасары Ли Сан-Ву қатысты. 
Жобаның мақсаты – қазақстандық студенттер мен оқушыларға ақпараттық технологиялар саласында тегін, сапалы білім беру. Жоба Қазақстанда 2017 жылы бастау алып, бүгінге дейін бірнеше жоғары оқу орнында жұмысын сәтті жүзеге асырып келеді.
Университет ректоры жобаның ІТ саласына қызығушылық танытқан студенттер мен оқушыларға мол мүмкіндік беретін атап айтты. 
-  Бүгінгі ашылып жатқан лаборотория, Самсунг компаниясының Атырау университетіне жасаған үлкен сыйы деп есептейміз. Бұл орталықта студенттерге, облыстағы оқушыларға тұрақты түрде дәрістер, практикалық сабақтар өткізіліп тұратын болады. Бұл жерде біздің магистранттарымыз да жасанды интеллект, программалау тілдері бойынша білім базасын толықтырып, тәжірибе алмаса алады, – деді С.Идрисов.
«Samsung Electronics Central Eurasia» компаниясының қолдауымен ашылған «Samsung Innovation Campus» жобасы - 13 жас пен 25 жас аралығындағы оқушылар мен студенттерге арналған бағдарламалау мектебіне айналады. Білім алушылар орталықтан Python бағдарламалық тілін үйреніп, дата-аналитик сарапшысы болып шығады.
- Біздің курстардың ресми атауы «Python тілінің негіздері» және «BigData негіздері» деп аталады. Бұл қазіргі уақытта әсіресе жас ІТ мамандар арасындағы трендтегі бағдаралмалар, қолданыстағы бағыттар деп айтсақ болады. Курс шамамен 5 ай уақыт алады, – дейді Samsung Electronics компаниясының корпоративтік коммуникациялар бөлімінің басшысы Берік Омаров.
Курсты аяқтаған түлектер мықты білім базасынан бөлек, әлемдік брендке айналған Samsung Electronics корпорациясының атынан барлық тиісті сертификаттарға ие болады. Бұл олардың алдағы уақытта ІТ саласындағы әлемдік алпауыт компанияларда қызмет етуіне мүмкіндігін тигізеді. 
Қазіргі уақытта жоба аясында Қазақстанда 1 200 ден астам студент пен оқушы білім алып жүр.

Тізімге қайта оралу