29.05.2024 664

Университетімізде физика, математика және цифрлық технологиялар ғылыми зерттеу институтының директоры, педагогика ғылымдарының кандидаты, қауымдастырылған профессор, ғалым-ұстаз Ғалия Қайдарқызының 60 жас мерейтойына арналған «Stem-білім берудің сапасын арттырудағы ғылыми зерттеулердің рөлі» атты семинар өтті. Ұлағатты ұстаздың мерейлі жасына арналған семинардың алғы құттықтау сөзін Х.Досмұхамедов атындағы Атырау университетінің Басқарма төрағасы – ректор Саламат Нұрмұханұлы ашты. «Бүгінгі ғылыми семинардың жұмысы, озық, жаңашыл тәжірибелермен жалғасатын болады деп есептеймін. Stem-білім беру тақырыбы, біздің университет үшін жаңа тақырып емес, бұл туралы көптеген ғалымдар жазып та, зерттеп те келеді. Аталмыш бойынша университеттің іргелеуіне, ғылым мен білімнің дамуына өз үлесін қосқан ғалымдарымыздың бірі Ғалия Қайдарқызы деп айта аламын», – деді Х.Досмұхамедов атындағы Атырау университетінің Басқарма төрағасы– ректор Саламат Нұрмұханұлы. ​Ғылыми семинарда PhD доктор Мақсот Елеусінұлының «Қазақстанда STEM педагогтарын даярлау», зуммен қосылған Орал қаласы физика-математика бағытындағы Назарбаев Зияткерлік Мектебі, Инженерлік-техникалық, шығармашылық және ақпараттық технологиялар, кеңейтілген зертханасының меңгерушісі Медет Есейұлының «STEAM технологиясы — қарышты дамуға бастар қадам» және Атырау қалалық №16 мектеп лицейі физика пәнінің оқытушысы, магистрі Козлов Валентин «STEM подход при решении физических задач» деген тақырыптарда баяндамалар жасап, қазіргі білім беру жүйесінің маңыздылығын атап өтті. ​Салтанатты жиында Ғалия Қайдарқызына, педагогика ғылымдарының докторы, профессор Иманғалиев Асхат Сәлімұлы, зуммен қосылған «КазИИТУ» ғылыми-білім кешенінің құрылтайшысы, профессор, ҚР Ұлттық Инженерлік Академиясының вице-президенті, академик, Орал қаласының құрметті азаматы Ақсерік Сарыұлы, шәкірттері Қазақ Ұлттық университетінің докторанты, «Торус» ЖСС директоры, Орал қаласынан келген қонақ, Даурен Гарипович, «Сенім» мектеп-балабақшасы элитарлық кешенінің директоры Гулмира Муканова, зум арқылы Қ.Жұбанов атындағы Ақтөбе өңірлік университеті, академиялық мәселелер жөніндегі проректоры Людмила Николаевна, мерейгердің ұстазы М.Өтемісов атындағы Батыс Қазақстан университетінен физика-математика ғылымдарының кандидаты Александр Кузьмичевтер жылы лебіздерін білдіріп, құттықтауларын жолдады. ​Сонымен қатар, университеттің Басқарма төрағасы-ректор Саламат Нұрмұханұлы, Ғалия Қайдарқызын мерейлі жасымен құттықтай келе, ҚР Жоғары білім беру қауымдастығы атынан «Үздік ғылым қызметкері» төсбелгісімен марапаттап, иығына шапан жапты. ​Салтанатты кеште Ғ.Қайдарқызына арналып бейнесюжет көрсетілсе, университет студенті «Асыл-ана» музыкалық ән-шашуын тарту етті. Іс-шара барысында проректор, декан, кафедра меңгерушілері құттықтау арқылы, тілектерін білдіріп, сыйлықтарын табыстады. Жиын соңын мерейлі белеске шыққан, Ғалия Қайдарқызы баршаға өзінің шексіз алғысын білдіріп, іс-шараны қорытындылады.

Тізімге қайта оралу