15.04.2024 960

Х.Досмұхамедұлы атындағы Атырау университетінің журналистика кафедрасының профессоры Қанат Әуесбай ҚР Ғылым және жоғары білім министрлігінің «Ғылымды дамытуға сіңірген еңбегі үшін» төсбелгісімен марапатталды. Жоғары марапат 12-сәуірде Астана қаласында Л.Гумилев ат. Еуразия Ұлттық университетінде көрнекті ғалым Қ. Сәтбаевтың 125 жылдығына орай өткен «Ғылым және білім-2024» халықаралық ғылыми конференциясында берілді. Төсбелгіні салтанатты жағдайда ҚР Ғылым және жоғары білім вице-министрі Дархан Ахмед-Заки тапсырды. Қанат Әуесбай медиа мен жоғары білім саласын ұштастырған 20-жылдық еңбек өтілі бар тәжірибелі маман, педагог-ғалым, филология ғылымдарының кандидаты (мамандық шифры: 10.01.10 - журналистика). Әр жылдары әл-Фараби ат. ҚазҰУ, Л.Гумилев ат. ЕҰУ, С.Өтебаев ат. мұнай және газ университеттерінде оқытушы, аға оқытушы, доцент, проректорлық қызмет атқарған. Ақпарат саласын зерттеуші ретінде көптеген ғылыми мақала авторы, оның ішінде Scopus ғылыми базасына енген мақалалары бар. Қанат Әуесбайдың қазақ және ағылшын тілдеріндегі «Батыс көрген. Ұлыбритания қазақтың көзімен – Looking west. A Kazakh’s view of Great Britain» кітабы Лондонда басылып, Кэмбридж университетінде таныстырылды (Ұлыбритания, 2016 ж.). Қ. Әуесбай ҚР Президентінің «Болашақ» халықаралық стипендиясы аясында Ұлыбританияда ғылыми-педагогикалық тағылымдамадан өткен (Шығыс Англия университеті, Норвич қ-сы, 2013-2014 жж.). Еуразия ұлттық университетінің журналистика және саясаттану факультетінде магистрлік диссертациялар қорғау жөніндегі мемлекеттік аттестациялау комиссиясы төрағасы (2023 ж.), Қазақстан педагогикалық ғылымдар академиясының корреспондент-мүшесі (2018 жылдан), республикалық оқу-әдістемелік кеңесінің оқу-әдістемелік бірлестігі мүшесі (РОӘК ОӘБ - 032 журналистика және ақпарат, 2019-2021 жж.), «Болашақ» бағдарламасы аясында шетелге кадрлар даярлау жөніндегі сарапшылық комиссиясы мүшесі (2019-2021 жж.). Медиа саласын зерттеген көптеген дипломдық жұмыстар, диссертациялардың ғылыми жетекшісі, диссертациялық Кеңес мүшесі болды. Қ. Әуесбай медиа сарапшы ретінде орта мектептің 5-9 сыныбына арналған «Жаһандық құзыреттілік» оқулығындағы «медиасауаттылық және қаржылық сауаттылық» аталған III-бөліміне кеңесші («Арман-ПВ» баспасы, Алматы, 2024 ж.), БАҚ өкілдеріне арналған көптеген авторлық шеберлік дәріс, медиатренинг пен семинар жүргізіп келеді. Қанат Әуесбайдың бастамасымен 2019 жылы «Атырау» телерадиоарнасы ғимаратында белгілі медиаменеджер, журналист Айтқали Құмарғалиұлы медиа-аудиториясы ашылды. Медиа-аудитория Х. Досмұхамедұлы ат. Атырау университеті және «Қазақстан» РТРК» АҚ Атырау облыстық филиалының бірлескен жобасы аясында дуалды білім беру мақсатында жүзеге асты. Қ. Әуесбай ҚР Білім және ғылым министрінің Құрмет грамотасымен (2019 ж.), университет дамуына қосқан үлесі үшін «Әл-Фараби атындағы Қазақ Ұлттық университетіне 80 жыл» медалімен марапатталған (2015 ж.).

Тізімге қайта оралу