09.04.2024 195

ҚАЗАҚСТАННЫҢ ЕҢБЕК ЕРІ ІЛИЯ ЖАҚАНОВ БӨГЕТ ТҰРҒЫЗУ ЖҰМЫСЫНА ҚОЛДАУ БІЛДІРДІ Тасқынмен күрес жұмысы тоқтаусыз түрде жүріп жатқан Алмалы ауылдық округіне қарасты аумаққа Қазақстан және Қырғызстан Республикаларының еңбек сіңірген қайраткері, Қазақстанның Еңбек ері, композитор, Х.Досмұхамедов атындағы Атырау университеті Музыка және өнер кафедрасының профессоры Ілия Жақанов арнайы атбасын бұрды. Қызу жұмыстың бел ортасына келіп, куә болған Ілия ағайымыз жағалауда бөгеттер салып жатқан студенттердің белсенділігіне риза болып, ақ батасын берді. Тұғырлы тұлға да қарқынды жұмысты жалғап, профессор-оқытушылармен бірге қапшыққа топырақ толтырып, бөгет салу жұмысына атсалысты. – Ұстаздардан бастап студенттерге дейін барлығы қаламызды тасқын суға жібермеудің амалын жасап, күн-түн демей Жайық жағасын бекіту үшін бар күштерін салуда. Ұлы ұстаз М.Әуезов «Қай істің болсын өнуіне үш шарт бар: ең әуелі – ниет керек, одан соң – күш керек, одан соң – тәртіп керек» деп айтып кеткен екен. Міне осының барлығы ел үшін еңбек етіп жүрген жандардың бойында бар қасиет. Осы қайратты қасиеттер нәтижелі жұмыстың болуына сеп болмақ. Бір кісідей жұмылып, сұрапыл тасқын болмаса екен деп, ел мен жерді, сәулетті қала Атырауды ойлап қызмет қылуда. Елдің тұтастығын осыдан білуге болады. Шыдамдылық пен төзімділіктің шындалар, бірліктің бекем болар тұсы. Біріге жасап жатқан жұмысымыз игілікті де абыройлы болғай,-деп ақжарма лебізін білдірді Ілия Жақанов. Сонымен қатар композитор «Жайық» өзенінің қасиетінен сыр шертіп, «Еділ мен Жайық» әнін де университеттің профессор-оқытушыларымен қосыла орындады. Содан соң өткенге көз тастап, 1994 жылы өңірде болған су тасқыны туралы тілге тиек етті. – Аймақта сұрапыл тасқын болған кезде Алматы қаласында болдым, бірақ келесі жылы Атырауға келдім. Дегенмен сол кездегі тасқын су елдің қабырғасын қайыстырғаны жасырын емес. Табиғи апатта адамдар ғана емес, малдың өзі де қиналды. Алайда елдің бірлігі мен тұтастығы, өзара ынтымақтастығы ғана сол қиындыққа төтеп берді. Сондықтан бірлігі мен татулығы жарасқан елдің алмас қамалы жоқ,-деді Ілия Жақанов. Табиғат апатынан сақтану жұмыстарына университеттің ардагер ұстаз-ғалымдары, Атырау облысының құрметті азаматтары, ақын Қадыр Жүсіп, профессор Асхат Иманғалиев, профессор Бақтыбек Таубаев, университеттің ардагерлер кеңесі төрағасы Шахман Нагимов ағаларымыз да бірнеше күннен бері белсене атсалысуда.

Тізімге қайта оралу