01.04.2024 352

Х.Досмұхамедов атындағы Атырау университетінің ғылыми кеңес залында «Отбасы банк» АҚ мамандары университет студенттерімен кездесті. 2024 жылы 1 қаңтардан бастап «Ұлттық қор - балаларға» бағдарламасы іске қосылған болатын. Аталмыш қор өскелең ұрпаққа мемлекет тарапынан болашақта аталған жинақтардың есебінен білім алуға және өздерінің тұрғын үй жағдайларын жақсартуға мүмкіндіктер беріп, қолдау көрсетеді. Осы орайда барлық балаларға жыл сайын ұлттық қордың инвестициялық кірісінің 50% есептеледі. Яғни, бала 18 жасқа толғанда БЖЗҚ-да оған арналған нысаналы жинақтау шоттары ашылады. 2006 жылы дүниеге келген бала қазірдің өзінде егер 18 жасқа толса немесе жақын арада толар болса БЖЗҚ шотынан қаражатты Отбасы банкінде ашылған өзінің ағымдағы шотына аудара алады. Осыған орай банк қызметкерлері студенттермен кездесіп, қор туралы ақпараттандырып, шоттағы түскен қаржыны қалай пайдалануға болатыны жөнінде мағұлмат берді. Кездесуге «Отбасы банк» АҚ бизнесті дамыту бөлімінің І санатты маманы Ырысбек Шәкір мен Қарлығаш Габдуллина бастаған банк қызметкерлері студенттердің осы бағыттағы сұрақтарына заң шеңберінде түсініктеме берді. Ырысбек Шәкірдің айтуынша бұл шоттан ақшаны екі мақсатта пайдалануға болады, атап айтсақ тұрғын үйге және білім алуға пайдалану мүмкіндігі бар. «Шотқа қаржының түсуі үшін ешқандай құжаттарды жинаудың, шот ашудың, қандай да бір ведомстволарға, оның ішінде БЖЗҚ-ға барудың қажеті жоқ. Ең бастысы- egov.kz веб-порталдағы жеке кабинетіңізде өздеріңіздің деректеріңіздің бар-жоғын әрі дәлдігін анықтау қажет. Ақпарат болмаса, оларды өзіңіз оңай енгізе аласыздар. Егер сіз 18 жасқа толып, алайда өз жинақтарын БЖЗҚ-дан алмасаңыз, онда олар зейнетақы қорында БЖЗҚ-дағы нысаналы жинақтаушы шоттарда он жыл сақталады, бұл мерзім аяқталғаннан кейін ерікті зейнетақы жарналары түрінде азаматтардың жеке зейнетақы шоттарына автоматты түрде аударылатын болады»,-деді Отбасы банк» АҚ бизнесті дамыту бөлімінің І санатты маманы Ы.Шәкір. Жиын соңында студенттер арнайы анкета толтырып, аталмыш банк қызметкерлерінен толыққанды ақпарат алды.✔️Айта кетейік университет ғимаратының 1 және 4 корпус ғимаратында Отбасы банк қызметкерлері жұмыс істеуде. Кеңесші мамандар арнайы шоттарды ашып, ұлттық қордан бөлінген қаражаттың баспана немесе оқу ақысын төлеуге пайдалану туралы нұсқау береді. ☎️Байланыс номері:8705 903 64 10

Тізімге қайта оралу