Қазақ спортының құлагері – Болат Теміров
Университетімізде 1 Наурыз - Алғыс айту күнін атап өту аясында Атырау облысының Құрметті азаматы, Қазақстанның еңбек сіңірген спорт шебері, Атырау университетінің түлегі, дарынды боксшы Болат Теміровтың өмір жолына арналған «Қазақ спортының құлагері» кітабының таныстырылымы өтті.
Болат Бисенұлы Теміров КСРО-ның 5 дүркін, Қазақстанның 7 дүркін чемпионы, көптеген халықаралық турнирлердің жеңімпазы мен жүлдегері.
1987 жылы КСРО Спорт және дене шынықтыру Мемлекеттік комитетінің бұйрығымен «КСРО спорт шебері» атанса, 1991 жылы «Халықаралық дәрежедегі КСРО спорт шебері», 1997 жылы «Қазақстан Республикасының Еңбек сіңірген спорт шебері» атақтарына ие болған тұлға. 1988-1992 жылдары Х.Досмұхамедов атындағы Атырау университетінің Дене шынықтыру және спорт мамандығында оқып, дене шынықтыру пәні мұғалімі біліктілігін алған.
Кітаптың салтанатты таныстырылымында Х.Досмұхамедов атындағы Атырау университетінің Басқарма төрағасы-ректор Саламат Идрисов, «Қазақ спортының құлагері» кітабының авторы Сәйпеден Сейдағалиев, «Атырау бокс федерациясы» қоғамдық бірлестігінің атқарушы директоры Батырхан Қалықов, елімізге танымал бапкерлер мен спорт шеберлері, Б.Теміровтың достары мен отбасы мүшелері қатысып, өз ой пікірлерімен бөлісті.
Атырау спортының ғана емес, қазақстандық спорттың дамуына аса зор үлес қосқан Болат Теміровтей азамат білім алған университетте кикбокстан әлем чемпионы Абзал Дюсупов, каратэден әлем чемпионы Марат Айткалиев, бокстан Қазақстан чемпионы, халықаралық универсиаданың күміс жүлдегері Сабырғали Аманат, Қазақстан чемпионы Ерболат Оңаев білім алса, бүгінгі таңда бокстан Қазақстан чемпионы, универсиада жүлдегері, 3-курс студенті Ақнар Ищанова, бокстан жастар арасындағы Қазақстан чемпионы, 1-курс студенті Алмаз Хинекин секілді жастарымыз бар.
Өнегелі жолында қазақ жастарының спортпен айналысып, жетістіктерге жетуіне себепкер болған Болат Бисенұлының көзі тірісінде жасаған жақсылықтары жайлы естеліктермен бөліскен замандастары университет ұжымына алғысын білдірді.
Болат Теміровтің ұрпақтары Аман Болатұлы мен Айман Болатқызы, Қазақстан Республикасы Парламенті Мәжілісінің IV шақырылымы депутаты, досы Болат Қонарбай, университеттің Дене тәрбиесі және бастапқы әскери дайындық кафедрасының меңгерушісі, профессор Алпысбай Аралбаев «Қазақ спортының құлагері» кітабының тұсаукесер лентасын кесті.
Кітап таныстырылымында даңқты боксшының өмір жолына арналған деректі фильм көрсетілді.
Құрметті оқырмандар, сонымен қатар ертең, 1 наурызда, Болат Теміровті еске алуға арналған бокстан халықаралық турнир басталатынын да атап өтеміз.
ПІКІРЛЕР