Алғыс күні қарсаңындағы құрмет
Елімізде 1 наурызда аталып өтетін Алғыс күні мерекесі қарсаңында Х.Досмұхамедов атындағы Атырау университетінде Атырау облысының Құрметті азаматы, қоғам қайраткері, облыстық Ардагерлер кеңесінің төрағасы, университет түлегі Өтешов Мұрат Сақтайұлының мерейлі жасына арналған ғылыми кеңестің кеңейтілген мәжілісі өтті.
Бүгінде оқу орнының мақтанышына айналған Мұрат Сақтайұлы өңірдің әлеуметтік-экономикалық дамуына қосқан айрықша үлесі үшін Атырау облысының және Индер, Махамбет аудандарының Құрметті азаматы атанған, мемлекеттік «Парасат», «Құрмет» ордендерінің, басқа да көптеген марапаттардың иегері.
Салтанатты жиынға ғылыми кеңес мүшелері, арнайы меймандар мен университеттің профессор-оқытушылары, студент жастар қатысты. Мерейтой Алғыс айту күні аясында өтіп, әріптестері өздерінің ақжарма тілегі мен ризашылығын білдірді.
Іс-шараның кіріспе сөзін алған университеттің Басқарма төрағасы -ректор Саламат Идрисов мерейтой иесінің өмір жолына тоқталып, университетпен көп жылғы әріптестік қызметі үшін алғыс білдіріп, оқу орнындағы құқықтану және кеден ісі мамандықтарын ашу кезіндегі қолдауы, көп жылдардан бергі студенттерге арнайы пәндерден дәріс оқып жүргені үшін Ғылыми кеңестің шешімімен «Х.Досмұхамедов атындағы Атырау университетінің Құрметті профессоры» атағы берілгендігін атап өтіп, Құрметті профессор куәлігін табыс етті.
Кезекті құттықтау сөзін жеткізген Қазақстанның Еңбек Ері, композитор, университеттің музыка және өнер кафедрасының профессоры Илия Жақанов мерейтой иесінің жан жақты білімді жан екендігін тілге тиек етіп, ел алдындағы еңбегі өлшеусіз екендігіне екпін беріп, өзінің «Аққу әні» кітабын сыйға тартты.
Атырау облысының Құрметті азаматы, Каспий аймағы Академиясының Президенті, педагогика ғылымдарының докторы, профессор Иманғалиев Асхат Сәлімұлы Мұрат Сақтайұлына қажырлы еңбегінің өлшеусіз әрі бар ғұмырын қоғам дамуына арнаған ерен еңбегінің зор екенін айтып, Каспий аймағы Академиясының Академигі атануымен құттықтап, салтанатты түрде табыстады.
Атырау облысының Құрметті азаматы, облыстық ардагелер кеңесінің төралқа мүшесі Мәдина Ғабдісәлімқызы, Қазақстанның Еңбек Ері, кәсіпкер Владимир Розметов, Атырау облысының Құрметті азаматы, ақын, профессор Қадыр Жүсіп, Атырау облысының Құрметті азаматы, профессор Бақтыбек Таубаев, Атырау облысының Құрметті азаматы, Атырау инженерлік-гуманитарлық институтының президенті, профессор Ерсайын Ихсанов, Адам құқықтары жөніндегі уәкілдің Атырау облысы бойынша өкілі Амангелді Абдолов, Атырау университеті Ақсақалдар кеңесінің төрағасы профессор Шахман Нагимов, «Amanat» партиясының Атырау облыстық филиалының төрағасы Абдолла Идресов, «Ақжол» партиясының Атырау облыстық филиалы төрағасы Ермекқали Юсупов, Атырау облысы Қазақстан халқы Ассамблеясының мүшелері, «Вайнах» шешен-ингуш этномәдени бірлестігінің құрметті төрағасы, Атырау облысы ҚХА Ақсақалдар кеңесінің мүшесі Зелимхан Зубариев, «Былина» орыс этно-мәдени бірлестігі төрағасы Андрей Кораблев мерейгерге ықылас білдіріп, алғыстарын жеткізді.
Алғыс айту қарсаңында өткен аталмыш шарада өзара мейірімділік, достық пен ризашылық сезімдері секілді адами құндылықтарымыз насихатталып, еңбек адамына құрмет көрсетіле отырып, өнегелі өмір жолы насихатталды.
ПІКІРЛЕР