Х.Досмұхамедов университетінде Қазақстан халқы Ассамблеясы ғылыми-сараптамалық тобының мәжілісі өтті
Жиынға Х.Досмұхамедов университетінің басқарма төрағасы-ректор Саламат Идрисов, Қазақстан халқы Ассамблеясы институтының директоры Жанна Кыдыралина, облыстағы өзге ұлт өкілдері мен түрлі бірлестіктерінің жетекшілері, профессор-оқытушылар құрамы, студенттер қатысты. «Мемлекеттің табысты болуы, халықтың бірлігіне, татулығына тікелей байланысты. Осы тұрғыда бірлігіміздің ұйтқысы болған Ассамблея өзінің өміршеңдігін дәлелдеді, іргелі институтқа айналды. Еліміздегі барлық этностың басын біріктіретін бірегей құрылым тұрақтылықты сақтап, еліміздің дамуы үшін маңызды рөл атқарып отыр», - деді басқарма төрағасы-ректор С. Идрисов.
Сондай-ақ, жиында ХХ ғасырдағы саяси қуғын-сүргін жылдарында қазақ даласына жер аударылған өзге ұлт өкілдерінің ұрпақтары қазақ халқының қонақжай, бауырмалдығына алғыс білдіретінін жеткізді. Алқалы бас қосуда Тәуелсіздік жылдарында елге оралған қандастарымыз да сөз алып, қасиетті Қазақ жерінің ұлттар мен ұлыстарға пана болған, шетелге тарыдай шашылған қандастарын ата-жұртына шақырған әлемдегі санаулы елдердің бірі екендігін айырықша атап өтті. «Мен қазақ болып туғаныма, өз отаныма оралғаныма өте қуаныштымын. Біз қиын-қыстау заманда шетелге бассауғалауға мәжбүр болдық. Мемлекет басшысы Қазақстанның қандастарды құшақ жая қарсы алатынын айтып, қазақтарды өз еліне шақырды. Өзге елде туып-өссекте үлкендеріміз қазақтың тілін, дінін, салт-дәстүрін ұмытпауды үнемі айтып отыратын. Елге келген соң әртүрлі салада еңбек еттім», - деді Хиуаз Доспанов атындағы қоғамдық бірлестіктің төрайымы, ардагер ұстаз Шахарман Абылқасымқызы.
Кеңейтілген кеңесте облыстық Қазақстан халқы Ассамблеясының жаңа құрамы бекітіліп, 2024 жылға арналған іс-шаралары мен жұмыс жоспары таныстырылды.
ПІКІРЛЕР