Рахат Жақсыбай студенттермен жүздесті
Қыркүйек айының 15-ші жұлдызында "Гуманитарлық ғылымдар жəне өнер" факультеті, журналистика мамандығының студенттері майталман журналист, білікті тележүргізуші, "Дарын" мемлекеттік жастар сыйлығының иегері Рахат Жақсыбаймен кездесу өткізді.
Кездесудің жалпы мақсаты - Англияда білім алған журналистің алған əсерін студенттермен бөлісіп, əрі қазақстандық БАҚ пен Батыс масс-медиясын салыстыру еді. Мақсатына қарай тақырыпта "Батыс масс-медиясы: қайда жəне қалай?" (ВВС мысалында)" болып өрілді. Білікті журналист өз сөзінде смартфонсыз - ақ өмірді мəнді өткізуге болатындығын, кітаптың тірлікке керекті нағыз азық екендігін, шетелдегі білім оңай келмейтіндігін, еліміздегі БАҚ-ты қалай көркейту керектігінен хабардар етіп, ең бастысы уақыт құндылығын жоғарғы санатқа қою керектігін басты назарға қойды. 1-сағаттан артық уақытқа созылған бұл шеберлік сағаттан жас журналистер бойына болашаққа нық қадам баса алатындай біршама энергияны, кедергіге оңай төтеп бере алатындай жоғарғы мотивацияны игеріп шықты десек артық етпес. Шетелдің аурасын аудиторияға кəсіби түрде жеткізген Рахат Жақсыбай кездесу соңында студенттерге сертификат үлестірді.
ПІКІРЛЕР