17.11.2023 436

17 қараша - Халықаралық студенттер күнінде ақын-композитор Махамбет Өтемісұлының шығармаларын жатқа оқудан «Айналайын, Ақ Жайық» атты байқау өтті. Рухани іс-шараны Х.Досмұхамедов атындағы университетінің 1998 жылығы түлектері ұйымдастырды. Байқаудың мақсаты – отты жыр мен өткір қылышты қатар ұстаған дауылпаз ақын, жорық жыршысы, композитор Махамбет Өтемісұлының өмірі мен шығармаларын студенттерге насихаттау, поэзияны мәнерлеп оқу дағдыларын дамыту, жастарды отан сүйгіштікке тәрбиелеу. Сондай-ақ, университет түлектері мен студенттері арасындағы ұрпақ сабақтастығын нығайтуды көздейді. Байқауға университет түлектері, Қазақстан жазушылар одағы Атырау облысы филиалының төрағасы, Махамбет сыйлығының иегері, ақын Әлия Дәулетбаева, «Атырау» облыстық телеарнасы директорының орынбасары, бас редактор Балауса Халелова, Х.Бөкеева атындағы БҚО Қазақ драма театрының актрисасы Нұргүл Жұбатова, қазақ тілі мен әдебиеті кафедрасының меңгерушісі Жұмазия Абдрахмановалардан құралған қазылар алқасы төрелік етті. Қазылар қатысушыларды өлең оқу мәнеріне, сахна мәдениетіне, дауыс көркемдігіне, жатқа оқу шеберліктеріне қарай бағалады. Махамбет жырларын оқу сайысына қатысуға Х.Досмұхамедов университетінің 100 шақты студенті ниет білдірген. Олардың арасынан іріктеуден өткен 9 білім алушы шешуші кезеңде бақ сынады. Байқау қорытындысы бойынша студенттер Үміт Сүндетқызы мен Ескендір Зұлқарнай 3 орын (35 мың теңге), Аружан Ғабитқызы 2 орынды (50 мың теңге), Ерлан Баймұханов 1 орынды (75 мың теңге) иеленді. Ал, қазылардың сынынан сүрінбей өткен Галина Евлоева бас жүлдені жеңіп алды. Оған түлектер 100 мың теңге қаржылай сыйылық табыстады. Х.Досмұхамедов атындағы Атырау университетінің ұжымы 1998 жылы оқу бітірген, бүгінде әртүлі салада абыройлы қызмет атқарып жүрген түлектерге студенттерге арнап рухани іс-шара ұйымдастырғандықтары үшін алғыс білдіреді.

Тізімге қайта оралу