17.11.2023 643

Биыл жыл басынан бері жергілікті полиция департаменті 1108 отбасындағы ұрып-соғу дерегін тіркеген. Тұрмыстық зорлық-зомбылық салдарынан зардап шегетін әйелдер мен балалар санының артуымен байланысты мәселеге баса мән беріліп, 2023 жылы бұл үшін заңға жауапкершілікті қатаңдату бойынша түзетулер енгізілді. Атап айтқанда, мұндай жағдай бойынша полицияға жәбірленуші әйел адамның арыз жазуы міндетті емес, хабарлама негізінде іс қозғала алады. Агрессордың үстінен қайталама шағым түссе, оның әкімшілік тәуліктік жазасы көбейтіледі. Сонымен қатар, қазіргі күні кез-келген зорлық-зомбылық дерегінің алдын алу мақсатында бірқатар шаралар қолға алынуда. Оның бірі, әсіресе, жасөспірімдер мен балаларға қатысты теріс әрекеттердің алдын алу мақсатында көзден таса, оңаша жерлерге (мәселер, гараждар маңына) орнатылатын SOS-тетіктер деуге болады. Бұдан бөлек, жаңа заң талаптарын болашақ заңгер студенттерге түсіндірген Атырау облысы полиция департаментінің жергілікті полиция қызметінің аға инспекторы, полиция майоры Раиса Айтжанова көпшілікті проблемаға енжар қарамауға шақырып, зорлық-зомбылық оқиғасына куәгер болған жағдайда да тәртіп сақшыларына хабарлауға болатынын еске салды. Ол зорлық-зомбылықтың физикалық, психологиялық, сексуалды және экономикалық түрлері болатынын айта келіп, олардың отбасында орын алуына көбінесе ішімдік ішу, есірткі тұтыну және құмар ойындарға әуестену факторлары ықпал ететінін атап көрсетті. Х.Досмұхамедов атындағы Атырау университетінде облыс бойынша Қазақстан әйелдер альянсының бастамасымен экономика және құқық факультеті қылмыстық-құқықтық пәндер кафедрасының ұйымдастыруымен өткен «Тұрмыстық зорлық-зомбылықтың алдын алу: құндылықтар жүйесі мен мінез-құлық үлгілерін трансформациялау» тақырыбында дөңгелек үстел өтіп, онда Атырау облысы әкімі жанындағы әйелдер істері және отбасылық-демографиялық комиссиясының мүшесі Жаннат Асабаева, Саясаткер әйелдер клубының төрайымы, Атырау Бизнес және құқық колледжінің директоры Нұрлы Айтиева, өңірлік денсаулық сақтау департаментінің бас суицидолог-клиникалық психологы, «Медициналық психология және әлеуіметтік қорғау» ҚБ директоры Ақмарал Шарипова және басқалар өзекті тақырып төңірегінде өнегелі әңгіме қозғай отырып, ерекше белсенділікпен қатысқан жастардың сауалдарына жауап берді. Дөңгелек үстел барысында қаладағы «Алмагүл» ықшамауданында орналасқан тұрмыстық зорлық-зомбылықтан жапа шеккен әйелдерге арналған дағдарыс орталығы жөнінде мағлұматтар беріліп, отбасындағы ынтымақты сақтау, өзінің құқықтарын біліп, жеке шекарасын айқындау бойынша мамандар тарапынан ақыл-кеңестер берілді.

Тізімге қайта оралу