Білімді ұрпақ: ғылым мен білімнің тәжірибесі және келешегі
Бүгін қоғам қайраткері, ғалым Асхат Сәлімұлы Иманғалиевтің мерейлі 70 жасқа толуына арналған «Білімді ұрпақ: ғылым мен білімнің тәжірибесі және келешегі» атты халықаралық ғылыми-тәжірибелік конференциясы өтті.
Салтанатты жиын барысында мерейгерге Қазақстан Республикасы Ғылым және жоғары білім министрі Саясат Нұрбек пен Қазақстан Республикасы Оқу - ағарту министрі Ғани Бейсембаевтің, Х.Досмұхамедов атындағы Атырау университеті Директорлар кеңесінің төрағасы Бейбіт Мамраевтың арнайы жолдаған құттықтау хаттары табыс етілді.
Конференцияға республика және ТМД көлеміндегі танымал ғалымдар, мемлекет және қоғам қайраткерлері, облыстың басшылығы, облыстың зиялы қауым өкілдері мен ардагер-ұстаздар қатысты.
Басқарма төрағасы-ректор Саламат Нұрмұханұлы:
“Х.Досмұхамедов атындағы Атырау университетінің 12-ші ректоры болып сайланған Асхат Иманғалиев бірнеше жылдар университетке басшылық етті. Бұл университет тәуелсіздіктің алғашқы он жылдығындағы қиындықтарды өткеріп, дамудың жаңа сатысына көшкен кезі болды. Университет жұмысын оңтайландыру бірнеше бағытпен жүзеге асырылды. Бірінші, нарықтық экономиканың және Атырау өңірінің еңбек нарығындағы сұраныстарға орай жаңа мамандықтар ашу, екінші– жергілікті университеттің ғылыми әлеуетін көтеру, үшінші – университеттің халықаралық байланысын дамыту арқылы танымалдылығын кеңейту, төртінші – материалдық базасын нығайту еді. Осы орайда Асхат Сәлімұлы облыстық әлеуметтік-экономикалық дамуына зор үлес қоса алды деп айта аламыз”,- деп мерейтой иесіне «Құрметті ректор» төсбелгісін табыстады.
Мазмұнды жиында педагогикалық білімнің даму бағыттары, білім беруді цифрландырудың болашақ ұрпақ үшін маңыздылығы, болашақ мұғалімдерді дайындаудың сапасын қамтамасыз ету тақырыбында баяндамалар жасалды.
“Асхат Иманғалиев педагогикалық кадрлар дайындауда орасан зор үлесі бар қара шаңырақ Халел Досмұхамедов атындағы Атырау университетін 2000-2008 жылдары басқарып, іскер басшы ретінде жемісті еңбек етіп, үлкен жетістіктерге жетті. 2002 жылы Асхат Сәлімұлының бастамасымен Атырау университетінің жанынан педагогика ғылымдарының кандидаты ғылыми дәрежесін беру жөніндегі 13.00.01 жалпы педагогика, педагогика және және білім тарихы, этнопедагогика шифрымен диссертациялық кеңес ашылды”,- деген педагогика ғылымдарының докторы Шолпан Джанзақова ұлағатты ұстаздың қайраткерлік, ғалымдық қасиеттерімен қатар адамгершілік, достық қарым-қатынасы ерекше екенін атап өтті.
Пленарлық мәжілісте Асхат Сәлімұлының «Ұстаз,Ғалым.Тұлға”Биобиблиографиялық анықтамасы мен “Здоровьесберегающая педагогика: теоретика-практические подходы» атты монографияның тұсауы кесілді.
ПІКІРЛЕР