Заңгер абыз-академик Салық Зимановқа арналған жиын өтті
Университетімізде Атырау облысынан шыққан заңгер абыз – Академик Салық Зимановқа арналған дөңгелек үстел өтті. Оған заң ғылымдарының докторы, профессор, С. Зиманов танушы Есберген Алауханов, Атырау облыстық сотының төрағасы Мұхтар Пәрменов, қоғам және мемлекет қайраткері Сәрсенбай Еңсегенов, Х.Досмұхамедов атындағы Атырау университетінің басқарма төрағасы-ректор Саламат Идрисов және оқытушы профессорлар құрамы мен студенттер қатысты.
Іс-шарада сөз алған Есбереген Алауханов: "Ұлы ұстаз бүкіл өмірін халық үшін арнап, соның ішінде заң саласына елеулі үлес қосқан тұлға ретінде танимыз. Халық арқалатқан аманатқа адал болып, жас мемлекетіміздің қанатының кең жаюына елеулі үлес қосты. Тұңғыш Конституциямыздың негізін қаласып, күні бүгінге дейін заңдылықтың салтанат құруына атсалысты. Тәуелсіздіктің алғашқы қиын да жауапты жылдарында Мемлекет басшысының қасында болып, азаттыққа жаңа қол жеткізген Отанымыздың өркендеуіне бағыт-бағдар берді, ұлт зиялыларының өнегесімен халыққа шынайы қызмет етті. Білікті заңгер маман ретінде егемендік, тәуелсіздік жолын¬дағы Қазақстанның халықаралық қатынастарын заңдастырып, қазақ тіліне мемлекеттік мәртебе беру, президенттік басқару институтын енгізу, құқықтық-демократиялық реформаларды жүргізу ісіне белсене араласты. Қазақстан мемлекеті мен құқығының тарихын, ұлттық мемлекет құрылымының теориялық мәселелерін зерттеуде жаңа ғылыми бағыт қалыптастырып, әділ сотты қамтамасыз ету үшін республикада сот мүшелерінің қатысуымен «билер алқасын» енгізуге басшылық жасаған. С.Зимановтың еңбектері ешқашан өшпейді, ғалымның шәкірттері жер-жерде өз қызметтерін адал атқаруда. Кез-келген ісіне жауапкершілікпен қарайтын ұлы тұлғаның қолынан, өмірінің соңғы күніне дейін қаламы түспеген",-деді.
Ал жиында Атырау облыстық сотының төрағасы Мұхтар Пәрменов, академик С.Зимановтың еңбегі ұшан теңіз, ол кісінің заң, құқық саласында жасаған еңбектері өлшеусіз екенін айтып, қазіргі жастарды да құқық саласына жұмысқа орыналасуға шақырды. Студент жастарды алған білімдерін, тәжірибе жүзінде ұштастырып заң саласында қызмет етсе, болашақта ертерек заң саласын қыр сырын меңгеруге мүмкіндік беретінін атап өтті.
Сондай-ақ сот жүйесіне наразылық танытып, кейбір азаматтардың заңға сенбейтіндіктері де баршылық. Бұның бәрі өзімізге байланысты, азамат болып қалыптасу сот жүйесін дамытамын деген жастар болса, біз әрқашан қолдау көрсетуге дайынбыз деді.
Аталған басқосуда университет ұжымы, оқытушы профессорлар қауымы мен студенттер, келген қонақтарға көкейінде жүрген заң саласындағы сұрақтарын қойып, нақты әрі тұшымды жауаптарын алды.
ПІКІРЛЕР