01.06.2023 291

Биылғы оқу жылы мектеп оқушылары мен мұғалімдер үшін бұрынғыдан өзгеше. Себебі, 25 мамыр - оқушылар үшін соңғы қоңыраудың сыңғыры естілер күн, барлық мектептерде 1 маусым күні тойланатын болды. Балаларды қорғау күнімен тұспа-тұс келген соңғы қоңырау шарасын Х.Досмұхамедов атындағы Атырау университетінің жанынан құралған дарынды ер балаларға арналған «Ұстаз» мектебінің оқушылары да атап өтті. 
«Сыңғырла, соңғы қоңырау» атты салтанатты мерекеге Атырау облыстық таланттарды қолдау және анықтау орталығының директоры Руслан Сарбалин, профессор Бақтыбек Таубаев және ардагер ұстаздар мен мектеп түлектерінің ата-аналары қатысты. 
«Ұстаз мектебетін құрған себебіміз Атырау өңірінің ауылдық жерлердегі білімді балалардың ұстаз мамадығын меңгеріп, өз елінің болашағына, білім саласына үлесін қосатын ер азаматтарды тәрбиелеу. Біз осы мақсатты абыроймен атқарып келеміз деп сенемін. Себебі, екі жыл ішінде жақсы нәтиже көрсетіп, үздік болған бітіруші түлектеріміз көп. Биылда бітіргелі отырған 35 түлек халықаралық, республикалық, облыстық  деңгейдегі додаларда топ жарды. Алдағы уақытта да мықты маман иесі болып, биіктен көрінулеріне тілектестік білдіремін», - деді Басқарма төрағасы-ректоры Саламат Идрисов. 
Салтанатты шара аясында республикалық, облыстық сайыстарға белсене қатысып, өңірдің  атағын алыс-жақынға танытып жүрген білімді оқушылар Егізбай Әлішер, Бақыт Ілияс, Кенжебай Бекжан және Төлеген Серім  «Үздік оқушы» дәрежесімен марапатталды. Сондай-ақ, университет ректоры Саламат Нұрмұханұлы биылғы оқу жылында әртүрлі жарыстарда жоғары нәтиже көрсеткен шәкірттердің мұғалімдерін «Алғыс хатпен» құттықтады.
Айта кетейік, Х.Досмұхамедов атындағы Атырау университетінің жанынан құралған дарынды ер балаларға арналған «Ұстаз» мектебін биыл 35 түлек тәмамдайды.

Тізімге қайта оралу