27.01.2023 390

27 қаңтар күні Х.Досмұхамедов атындағы Атырау университетінде жастар арасында сыбайлас жемқорлыққа қарсы мәдениетті қалыптастыруға бағытталған жиын өтті. Университет ректоры Саламат Идрисов бұл тақырыптың қазіргі қоғам үшін өзекті екендігін және оның алдын алу, болдырмау мақсатында оқу орнында тұрақты, жүйелі түрде шаралар өтіп тұратындығын атап өтті. 
Сондай-ақ, ҚР сыбайлас жемқорлыққа қарсы іс-қимыл агенттігінің Атырау облысы бойынша департаментінің басшысы Ерұлан Серікқалиев, «Әділдік жолы» республикалық қоғамдық бірлестігінің Атырау облысы бойынша филиалының басшысы Мақсот Құсанов жастар арасындағы «қоғам дертімен» күрес мәселесін қозғап, университеттің академиялық мәселелер жөніндегі проректоры Асхат Шүкіров «ISO 37001 сыбайлас жемқорлыққа қарсы менеджмент жүйесін енгізу» стандарты туралы және академиялық адалдық ортасын қалыптастыру бойынша атқарылып жатырған жұмыстар жөнінде айтты.
Жиынның соңында қатысушылардың сұрақтарына жауап беріліп, аталған департамент басшысының атынан сыбайлас жемқорлыққа қарсы саясатты іске асыруға белсенді қатысқаны үшін Атырау университетінің экономика және құқық факультетінің студенттері Бекнұр Абдусламов пен Диас Базарбаев марапатталды.

Тізімге қайта оралу