«Атамекен» рейтингінің нәтижесі жарияланды
Айта кетейік, «Атамекен» ҰКП ұлттық рейтингі осымен бесінші жыл қатарынан жоғары оқу орындарының білім беру бағдарламаларына тәуелсіз бақылау жүргізіп келеді. Ол материалдарды жинау, сараптау және рейтинг түзу сынды үш кезеңнен тұрып, 19 критерий бойынша бағаланады. Критерийлер қатарына оқу орнын өткен жылы бітірген түлектердің жұмысқа орналасу пайызы, орташа еңбекақы көлемі, оқытушылар құрамының сапасы, жоғары оқу орындарының білім беру бағдарламаларына салатын инвестициялары, білім беру бағдарламаларын дайындау дерегі, элективті пәндер каталогы, салалық қауымдастықтар мен жұмыс берушілер бірге жасаған силлабустар, білім беру бағдарламаларының өзектілігі мен халықаралық аккредитациядан өтуі, академиялық ұтқырлық, студенттердің стартап жобалары және басқалар енеді. Соңғы ерекшелік, түлектердің жұмысқа орналасуы ғана емес, олардың жалақы деңгейі де есепке алынатын болған.
Осы орайда, Х.Досмұхамедов атындағы Атырау университетінде жұмыс берушілермен байланыс және кәсіби бағдар жұмыстары жолға қойылғанын және жыл сайын тиімді жүргізілетінін айта кету керек. Соның нәтижесінде қазіргі күні жоғары оқу орнының түлектері түрлі салаларда табысты еңбек етіп, көзге түсіп жүр. Өз кезегінде Атырау университеті мамандықтар бойынша кәсіби стандарттар мен болашақ мамандықтар Атласы бойынша жасақталған білім бағдарламаларын еліміздің және шетелдік талапкерлер мен олардың ата-аналарына ұсынуға дайын.
Сонымен қатар, «Атамекен» ҰКП ұлттық рейтингінің қорытындысы соңғы кездері университеттен даярланып шыққан жас мұғалімдердің біліктілік деңгейіне қатысты айтылған сынның негізсіз екенін көрсетіп отыр. Оған сәйкес, Х.Досмұхамедов атындағы Атырау университеті бойынша педагогика және психология пәні мамандығының көрсеткіштері - 34 университет арасынан, орыс тілі мен әдебиеті пәндерінің мұғалімі мамандығының көрсеткіші - 18 университет арасынан бірінші; орыс тілінде оқытпайтын мектептердегі орыс тілі мен әдебиеті пәндерінің мұғалімі, логопедия, бейнелеу өнері және көркем еңбек, дизан, білім беру жүйесінде суретші-дизайн мамандықтары отызға тарта жоғары оқу оындарының ішінен – екінші; инженерлік профиль бойынша химия пәні мұғалімі мен қазақ филологиясы мамандықтары үшінші орынды көрсетіп тұр. Жалпы, университет бойынша педагогикалық бағыттағы мамандықтардың басым бөлігі алғашқы ондыққа кіреді. Атыраулық жоғары оқу орнының бұл жағынан еліміздің орталықтарында орналасқан үлкен университеттермен иық тіресіп, бір қатардан көрінгені – қуантарлық жай.
Соңғы рейтингте оқу орны түлектерінің жұмысқа орналасуымен қатар, жалақы деңгейі де енетінін айтқан болатынбыз. Атырау университеті бойынша былтыр оқу бітірген математика пәні мұғалімі – 336313 теңге, қазақ тілі мен әдебиеті – 291 101 теңге, аударма ісі – 232860 теңге, педагогикалық бастауыш білім беру – 225925 теңге, арнайы педагогикалық мамандар, дефектология – 213925 теңге, педагогика және психология мамандығының иегері – 202352 теңге алады. Бұл жерде барынша шынайы ахуалды көрсетеді деп есептелінетін медиандық орташа жалақы көлемі көрсетілген.
Рейтинг нәтижесімен аталған агенттіктің сайты арқылы танысуға болады: https://atameken.kz/ru/university_ratings
ПІКІРЛЕР