Жаңа форматтағы ҰБТ басталды
Кеше Халел Досмұхамедов атындағы Атырау мемлекеттік университетінің базасында талапкерлердің алғашқы легі білімдерін сынады.
Атырау университетінің Ұлттық Тестілеу Орталығының №30 бөлімшесінің директоры Айнагүл ДЮСЕКЕНОВАНЫҢ айтуынша, биылғы жылғы Ұлттық бірыңғай тестілеу жаңаша форматта өткізіліп жатыр. «Білім және ғылым министрлігі енгізген ең басты өзгерісі ол мектеп бітіруші түлек ең бірінші мектеп базасында қорытынды аттестаттау тапсырып, аттестат алады және сол арқылы ҰБТ-ны іріктеу емтиханы ретінде оқу орнына келіп тапсырады. Тағы бір басты өзгеріс – тестілеудің пәндері өзгертілді. Түлектер бес пән бойынша қорытынды аттестаттау тапсырады. Ол: оқыту тілі пәні бойынша қазақ тілі және әдебиеттен эссе жазады, алгебра және анализ бастамалары пәнінен бақылау жұмысын жазады. Сондай-ақ Қазақстан тарихынан билет сұрақтары арқылы тапсырады. Одан кейінгі төртінші емтихан пәні қазақ мектептері орыс тілінен, орыс мектептері қазақ тілі пәнінен тест тапсырады. Ал бесінші пән, түлек өзі таңдаған пәнінен тест тапсыру болып есептелінеді. Оқушылар аттестаттарын алғаннан кейін жоғары оқу орнына түсу үшін ҰБТ тапсырады. Онда бес пән бар: математикалық сауаттылық, оқу сауаттылығы, Қазақстан тарихы және екі таңдау пәні. Талапкердің максималды түрде 140 балл жинауға мүмкіндіктері бар. Олай дейтін себебім – таңдау пәні бойынша екі дұрыс жауаптан берілген, сол арқылы оқушы өзіне балл қосып жинай алады. Бұл мектеп бітіруші түлектің таңдау пәнін теориялық тұрғыда қандай дәрежеде меңгергенін тексереді,» - дейді Айнагүл Дюсекенова.
Тестілеуге 437 талапкер қатысты, оның ішінде қазақ тілінде – 263, орыс тілінде – 174. Талапкерлеге сынақ тапсыру үшін 3 сағат 50 минут беріледі. Осы уақыт ішінде 120 сұраққа жауап беруі қажет. 140 баллдың 50 баллын жинаған жағдайда талапкер оқу орнына түсе алады.
Талапкерлер ҰБТ тапсырып жатқан кезде университет алдында «баласы атқа шапса, анасы үйде отырып тақымын қысар» дегендей, көңілі жай таппай тұрған ата-аналарды сөзге тартып көргенбіз. Қала тұрғыны Анар ШАГЕЛБАЕВА №11 Ы. Алтынсарин атындағы орта мектепті тәмамдағанын, сынаққа үздіксіз дайындалып келгенін және жақсы нәтиже күтетіндігін айтады.
- Биылғы ҰБТ өзінің жаңа форматымен ерекшеленді. Қызым жоғарғы деңгейде үнемі дайындалды. Дәл қазір жүрегімізде қобалжу бар, ұл-қыздарымыздың аман-есен жақсы балл жинап шығуын кешке дейін күтеміз, - деді Анар Шагелбаева.
Ал сынақты алғашқыдлардың бірі болып тапсырып шыққан мектеп түлегі Азамат РЫСҚАЛИЕВ болса, жаңа форматтағы ҰБТ-ға ақпан айынан бастап дайындалғандығын, сұрақтардың қиын болмағандығын, дайындалған сұрақтар кезіккендігін айта келіп, жоғары балл жинайтындығына сенім білдірді.
Айта кетейік, тестілеудің қорытындысы әр талапкердің жеке коды бойынша ғаламторда жария етіледі.
Алтынай СӘЛІМГЕРЕЙҚЫЗЫ
ПІКІРЛЕР