22.06.2022 102

Маусым айының 22 күні Х.Досмұхамедов атындағы Атырау университетінде көптілді білім беру факультетінің бітіруші түлектеріне диплом табыстау шарасы өтті. Салтанатты жиында Басқарма төрағасы-ректор Саламат Нұрмұханұлы, профессор Қадыр Жүсіп, оқу орнының ардагер ұстаздары, оқытушы ғалымдары түлектерді құттықтап, алған біліміне сай елге қызмет етуге шақырды. «Құрметті түлектер, сіздерді бүгінгі жоғарғы оқу орнын сәтті аяқтап, үлкен мақсаттарыңның бір сатысына көтерілуімен шын жүректен құттықтаймын. Бітіруші түлектердің арасында әр түрлі облыстық, республикалық байқауларға қатысып, университетіміздің атақ-абыройын шығаруға өзіндік үлекстерін қосқан студенттерімізде жетерлік. Осы орайда сіздерге тек қана Атырау өңірінің емес, еліміздің үздік деген мамандарының қатарынан табылып, жетістікке жетуге тілектеспін»,- деді Саламат Нұрмұханұлы. Жоғарғы оқу орны кім үшін де естен кетпес қуанышты шақтарымен, жаңа таныстықпен, түрлі дүниелерді үйренуге деген үлкен қызығушылықпен өткен қызықты күндердің бір бөлшегі екені рас. Дәл осы жерден сіз үлкен өмірдің әр сәтіне дайын болар тұлға болуға алғаш аяқ басасыз. Осы ретте көптілді білім беру факультетін 370 бакалавр және 39 магистр бітіріп отыр, оның ішінде 53 студент үздіктер қатарынан табылды. Жиын барысында осындай қызығы мен қиындығы қатар жүрер студенттік өмірде белсенділік танытып, түрлі сайыстарда жетістікке жеткені үшін Сарбиназ Нажмаддинова мен Гүлдана Бижанова Атырау қаласының жастар ресурстары орталынығының алғыс хатымен, Жанерке Мустахим «Аманат» партиясы Атырау облыстық филиалының алғыс хатымен және Фариза Амангелдіқызы Атырау қаласы әкімдігінің алғыс хатымен марапатталды. Шара соңында диплом табыстау рәсіміне арнайылап келген ата-аналар сөз сөйлеп, ұстаздарға өз алғыстарын жеткізіп, ізгі тілектерін жолдады.

Тізімге қайта оралу