17.06.2022 443

Бүгін, 17 маусым Х.Досмұхамедов атындағы Атырау университетінің жанынан құрылған дарынды ер балаларға арналған «Ұстаз» мектебінің алғашқы түлектеріне жалпы білім беру туралы аттестат табыстау рәсімі өтті. Салтанатты шарада Басқарма төрағасы-ректор Саламат Нұрмұханұлы, мектеп директоры Сәнім Уапқызы ел үмітін ақтайтын ерек ұлдарға ерекше тілектерін жеткізіп, жаңа өмірде сүрінбей армандарына жетуге тілектестік білдірді. Болашақ ер мұғалімдерді даярлау жолында ашылған бұл мектептің ел үшін де маңызы жоғары. Қазірдің өзінде үлкен сұранысқа ие, аз уақыт ішінде бірнеше жетістікке жетіп, көпке үлгі болған, білім іздеген жас талапкердің бар ынтасын өзіне аудара білген «Ұстаз» мектебін биыл 38 оқушы тәмамдады. Оның ішінде 8 оқушы, Бекзат Елеусинов, Диас Жомарт, Асылбек Ажигереев, Қуаныш Бексұлтан, Нұрболат Айыпов және Әлихан Кереев, Мағжан Есенжан, Саят Сайынұлы «Алтын белгі» иегерлері атанса, Елхан Бағдат пен Нұрпейіс Тұмақбай «Үздік аттестатқа» лайықты деп танылды. Шара аясында болашақ ұстаздарға сәт сапар тілеп, ақ батасын арқалап келген ата-аналар жас түлектерге жүрекжарды тілектерін жеткізді. Соның ішінде, Индер ауданы, Елтай ауылының Мұқанғазы Сиранов атындағы орта мектебінің тарих пәнінің мұғалімі-Жәния Жақауқызы және «Шаңырақ» балалар ауылының директоры Гүлсара Ботатаева сөз сөйлеп, мұғалімдерге өз алғыстарын жеткізіп, мектеп түлектеріне ықыласты тілегін айтып, ерекше күнмен құттықтады.

Тізімге қайта оралу