Дүниені дүбірлеткен дарабоз
Танымал қазақ жеңіл атлеті, КСРО чемпионаттарының чемпионы және жүлдегері, КСРО рекордсмені, Еуропа Кубогының иегері, Еуропа чемпионатының жүлдегері, КСРО еңбек сіңірген спорт шебері, Қазақ КСР еңбек сіңірген жаттықтырушысы ӘМИН ЕЛЕМЕСҰЛЫ ТҰЯҚОВТЫҢ мерейлі 85 жасына арналған «Дене шынықтыру және спорт мұғалімдерін даярлауды жетілдіру: теория және әдістеме мәселелері» республикалық ғылыми-практикалық конференциясы өтті. Пленарлық жиналысқа Қазақстан Республикасы Ұлттық Олимпиада комитеті Спорт департаментінің директоры Елсияр Баймұхамедұлы, Қазақстан Республикасы Білім және ғылым Министрлігі «Ұлттық ғылыми-практикалық дене тәрбиесі орталығы» РМҚК бас директоры Сағдат Кәбірұлы, «Дене шынықтыру және спорт бойынша республикалық оқу - әдістемелік және талдау орталығының» директоры Қыдырбек Әділбекұлы, Қазақстан Республикасы Жеңіл атлетика федерациясының атқарушы директоры Павел Иванович, Қазақстан Республикасының жеңіл атлетикадан мемлекеттік жаттықтырушысы Куандык Ескермесович , Қазақ спорт және туризм академиясының спорт жұмыстары жөніндегі проректоры, педагогика ғылымдарының кандидаты, профессор, Михаил Николаевич онлайн форматта қатысып, жүрекжарды тілектерін жолдады. Атырау қаласының әкімі Мейірім Жоламанұлы өз құттықтауын табыс етіп, Қазақстан Республикасы Ұлттық Олимпиада комитетінің бірінші вице-президенті Анатолий Қожекенұлы «Әмин Тұяқов - рекорд жасаушы чемпион, зерделі математик» тақырыбында баяндамасын оқыды. Мазмұнды жиын барысында мерейгердің «Дүниені дүбірлеткен дарабоз» кітабының тұсаукесер рәсімі өтті. Шара соңын ақын, филология ғылымдарының кандидаты Маржан Ершу өз өлеңімен аяқтады: Әмин аға қуанттың алашыңды, Жиыпсың бойыңызға бар асылды. Ерлерді ел сыйлаған атап өтіп, Атыңды жырға қоссақ жарасымды. Жаны бір игі жансыз құдай деген, Жарыстыңыз қыран мен құмайменен. Чемпиондар әлемде санаулы ғой, Жүзіңізден арайлы шырай көрем. Қазақтың атын әлемге танытқан дарабоз, саналы ғұмырын спортқа сарп еткен саңлақ спортшы Әмин Тұяқовқа мықты денсаулық, қажымас қайрат, отбасына бақ-береке тілейміз. Әмин Тұяқов есімі - ХХ ғасырдың ең үздік 10 спортшысы сапында спорт тарихында алтын әріптермен жазылған, 1960 жылдары әлемдегі ең мықты желаяқтардың бірі болған, Еуропа кубогінің иегері, 6 рет КСРО чемпионы, ондаған халықаралық сайыстардың жеңімпазы, 14 рет КСРО Қарулы күштерінің чемпионы болып, алты рет КСРО рекордын жаңғыртқан спортшы.
ПІКІРЛЕР