«Білгенге маржан» кітап оқу сайысының марапаттау рәсімі өтті
Х.Досмұхамедов атындағы Атырау университетінде «Мирасқор» қоғамдық қорының жетекшісі – Есқали Амандық Бағытұлының ұйымдастыруымен алғаш рет «Білгенге маржан» кітап оқу сайысының марапаттау рәсімі өтті. Сайысқа Атырау қаласының орта жастағы мектеп оқушыларымен қатар, университет студенттері де белсене қатысып, жүлделі орындарға ие болды. Шараға Атырау қаласы әкімінің орынбасары Емберген Самат Жұмабайұлы және университет ректоры Идрисов Саламат Нұрмұханұлы қатысып, сайыскерлерді жеткен жетістіктерімен құттықтай келе, кітаптың адам болмысына, ел болашағына пайдасы зор екенін жеткізді.
Жарыста мектеп шәкірттері Ілияс Есенберлиннің «Көшпенділер» трилогиясын оқып бақ сынаған болса, университет жастары «Жаңа гуманитарлық білім.Қазақ тіліндегі 100 жаңа оқулық» жобасы аясында шығарылған «Internet психологиясы» және «Төртінші индустриялық революция» кітаптарын оқып, өздерінің білімге деген қызығушылықтары мен ынталарын көрсетті.
Кітап – адам жанының рухани байлығы, таусылмас қазынасы.Оқығанын көңіліне тоқып, бойына дарыта білген жас оқырмандар болашақтан үлкен үміт күттірер бүгінгінің жеткіншектері. Осы орайда, екі ай уақыт бойы жүзеге асқан кітап оқу сайысында, мыңға жуық кітап сүйерлердің арасынан суырылып шығып, студенттер арасынан үшінші орынды Исламова Асия Болатқызы иеленсе, екінші орынға Қалым Ақбаян Асылбекқызы жайғасты, жүлделі бірінші орынды Махмиден Марта Орынбасарқызы жеңіп алды. Сонымен қатар, шара барысында бір топ мектеп оқушылары алғыс хатпен марапатталып, жүлделі орындарға ие болған білім ордасының шәкірттеріне арнайы сертификаттар табысталды. Осындай сайыстарға атсалысып, белсене қатысқан жас кітап сүйер қауымды жеткен жетістіктерімен ҚҰТТЫҚТАЙМЫЗ! Мақсаттары айқын, алар асулары биік болсын.
ПІКІРЛЕР