Аманкелді Шамғонов мерейлі жаста
18 мамыр күні Қазақстан Республикасы Білім беру ісінің үздігі, Қазақстанның үздік өлкетанушысы, Қазақстан Республикасы Тарих және қоғамдық ғылымдар Академиясының академигі, Халел Досмұхамедов және Махамбет атындағы сыйлықтардың лауреаты, Исатай ауданының Құрметті азаматы, Қазақстан және дүниежүзі тарихы кафедрасының профессоры Шамғонов Аманкелді Шамғонұлының 80 жас мерейтойына арналған кеңейтілген Ғылыми кеңес мәжілісі өтті.
Дүниедегі мамандық атаулының төресі – ұстаздық. Қай заманда болсын, ұстаздарға құрмет жоғары болған. «Адамның адамшылығы - жақсы ұстаздан» деп ұлы Абай айтқандай, жақсы ұстазға кезігіп, тәлім - тәрбие алған студент өмір майданында мойымай күресіп, болашақ жолдарда бағытынан таймасы анық. Өмірлік таңдауын ұстаздық даңғылдың соқпағында жүріп іскерлікпен ұштастырған мерейлі жас иесі Аманкелді Шамғонұлы - әріптестері арасында абыройлы жан.
Ұлағатты ұстаздың мерейлі жасқа шығуына арналған жиынның алғы сөзі Х.Досмұхамедов атындағы Атырау университетінің Басқарма төрағасы – ректор Идрисов Саламат Нұрмұханұлына берілді.
Университеттің кеңейтілген Ғылыми Кеңесіне қатысқан қонақтар қатарында Атырау облысы әкімінің орынбасары, «Былина» орыс этномәдени бірлестігінің төрағасы , Х.Досмұхамедов атындағы Атырау университеті ұжымы, шәкірттері, отбасы, сонымен қатар, ҚР Парламенті Мәжілісі депутаты, еліміздің түкпір-түкпіріндегі оқу орындары басшылары, шетелдік университет профессор-оқытушылары, онлайн форматта «ZOOM» бағдарламасы арқылы қатынасып, жүрекжарды тілектерін жеткізді.
Жиын басында мерейгер өмірінен қысқашашолу ретінде бейнеролик жүргізіліп,
білім, ғылым, тәрбие саласындағы жетістіктері үшін ҚР ЖОО қауымдастығының «Ахмет Байтұрсынов» атындағы алтын медалін табыс етті.
Абат Сатыбайұлы: «Амангелді ағайды ел руханиятына еселей үлес қосқан бірегей Исатайтанушы ғалым ретінде танимыз. Сізді Атырау өңірінің абызы сынды қоғам қайраткері, еліміздің қоғамдық өміріне белсене араласып жүрген тұлға, туған өңір абыройын асқақ ұстаған қайраткер, өлкетану саласының өзіндік ғылыми мектебінің иесі тұрғысында білеміз. Осынау мерейлі жасыңызда сізге мықты денсаулық, шығармашылық табыстар тілеймін», - деп өз құттықтауын жеткізді.
Басқосу соңын мерейтой иесі баршаға өзінің шексіз алғысын айтып қорытындылады.
ПІКІРЛЕР