«Жанымды тербеткен Жайықтың толқындары» Композитор Қалдыбек Құрманәлімен кездесу кеші өтті

«Жанымды тербеткен Жайықтың толқындары» Композитор Қалдыбек Құрманәлімен кездесу кеші өтті

  Х.Досмұхамедов атындағы Атырау университетінде Қазақстан Республикасының еңбек сіңірген қайраткері, композитор, Шәмші Қалдаяқов атындағы халықаралық ән фестивалі дирекциясының бас директоры, «Шәмші» ұлттық мәдениет және ғылыми-танымдық журналының бас редакторы, Түркістан облысының «Құрметті азаматы» Қалдыбек Құрманәлімен шығармашылық кездесу өтті.
 «Жайықтың толқындарын» көңілмен сезіп, жүрекпен тебіренте жырлаған Қалдыбек Құрманәлінің бұл - Атырауға алғаш келу сапары. Ол өз сөзінде «Жайықты алғаш рет көріп, көңілім толқыды. Мүмкін, тағы да бір жақсы ән туар деп ойлаймын», - деп Атырау өңірінің қонақжайлылығына алғысын білдірді. Кеш барысында, Қалдыбек Құрманәлі қазақтың талантты тумасы, бард ақын Табылды Досымов туралы жақсы естеліктерімен бөлісіп, оның адами құндылығы, ерекше таланты жайында тілге тиек етті. Әсем ән төгілген әдемі жиынның сәнін «Биіктік» әнін шырқаған Абыл Досымов, сазгермен бірге ән айтқан әнші Гүлмайдан Сүндетқызы келтіре түсті.
 Кездесуге кеш қонағын қолдап, мемлекет және қоғам қайраткері Сәрсенбай Құрманұлы және ақын, халықаралық «Алаш» әдеби сыйлығының лауреаты Жұмабай Құлиев келді. Шарада Қазақстанның еңбек сіңірген қайраткері, Махамбет атындағы сыйлықтың лауреаты Қойшығұл Жылқышиев Қалдыбек Құрманәліге көрнекті композитор Шәмші Қалдаяқовтың ән өнерін ұлықтап жүргені үшін алғысын жеткізіп, «Талант» медалін табыстады. Мұнайлы өлкеге сапары туған күнімен тұспа-тұс келген Қалдыбек Құрманәліні университет проректоры Ләйла Ерболатқызы құттықтап, арнайы сый-сияпат табыстады.

ПІКІРЛЕР

Тізімге қайта оралу