Атырау университеті Қырғызстанның екі жоғары оқу орнымен меморандумға қол қойды
Алматыдан ақжолтай жаңалық! Оңтүстік астанада өтіп жатқан Орталық Азия елдері ректорларының форумы аясында Х.Досмұхамедов атындағы Атырау университеті Қырғыз Республикасындағы Ош мемлекеттік университеті мен Тыныстанов атындағы Ыстықкөл мемлекеттік университетімен меморандумға қол қойды.
Айта кетейік, Ош мемлекеттік университеті Қырғызстандағы ең үлкен және ең көне университеттердің бірінен саналады. Ол 1939 жылы Ош мұғалімдер институты болып құрылған, 1951 жылы Ош мемлекеттік педагогикалық институты, 1992 жылы Ош мемлекеттік университеті болып өзгертілген. Бүгінде ол алыс шетелдің 33 еліндегі 267 университетпен ынтымақтастық орнатқан. Ош мемлекеттік университетінің түрлі мамандықтарында Чехия, Испания, Түркия, Польша, Ресей, Украина, Үндістан, Пәкістан, Бангладеш, Қытай, Корея, Қазақстан, Өзбекстан, Тәжікстан және басқа да жақын және алыс шетелдердің мыңдаған студенттері білім алуда.
Қасым Тыныстанов атындағы Ыстықкөл мемлекеттік университеті (ИГУ) — Қырғызстанның Ыстықкөл жағалауындағы ең ірі жоғары оқу орны. Қаракөл аласындағы оқу орны 1940 жылы негізін қалаған. 1992 жылдың желтоқсан айында Қырғыз Мемлекеттік Университеттің Қаракөл филиалы дербес университет болып, оған республикадағы филология ғылымының негізін қалаушы, ағартушы және қоғам қайраткері Қасым Тыныстановтың есімі беріледі.
Осылайша, халықаралық байланыстың нығаюын стратегиялық басты бағыттардың бірі ретінде қарастырып отырған Х.Досмұхамедов атындағы Атырау университеті тағы бір маңызды қадам жасап, үлкен мүмкіндіктерге жол ашып отыр.
Алматыдағы Орталық Азия жоғары оқу орындарының өңірлік ынтымақтастығын кеңейтуді көздеген Орталық Азия елдері ректорларының форумына Қазақстан, Қырғызстан, Тәжікстан, Түрікменстан және Өзбекстан Білім министрліктерінің өкілдері, Қазақстан мен Орталық Азия елдерінің жоғары оқу орындарының ректорлары, Microsoft, QS, Elsevier, Clarivate Analytics сияқты ірі ұйымдардың өкілдері, сондай-ақ, Еуропа Кеңесінің, Болон процесінің бақылау тобының (Bologna Follow-Up Group), Латвия академиялық ақпарат орталығының өкілдері қатысқан.
ПІКІРЛЕР