Батыс пен шығыс арасына - білім көпірі
Биыл Атырау және Маңғыстау облыстарының түлектері үшін еліміз бойынша техникалық мамандықтарға түсіп оқуға 10 мың грант бөлініп отыр. Белгілі болғандай, оның ішінен 4 мың грант Атырау, 6 мың грант Маңғыстау облысына қарастырылған.
Осы орайда Х.Досмұхамедов атындағы Атырау университетіне Дәулет Серікбаев атындағы Шығыс Қазақстан техникалық университетінің ректоры Жасұлан Құдайбергенұлы Шаймарданов бастаған оқытушы ғалымдар тобы келіп, кәсіби бағдар жұмыстарын өткізді. Онда оқу орны жайлы барлық мәліметтер атыраулық мектеп бітіруші түлектерге, ата-аналарға презентация түрінде таныстырылды, толығырақ https://www.ektu.kz/?lang=kz сайтында.
Қазіргі күні Х.Досмұхамедов атындағы Атырау университеті мен Дәулет Серікбаев атындағы Шығыс Қазақстан техникалық университетінің арасындағы келісім-шартқа сәйкес, біздің облысымыздан ШҚТУ-ға грантқа оқуға түскен студентке бірінші курсты Атырау университетінің базасында оқып, студенттік өмірге бейімделуге мүмкіндік бар. Әрі қарай оқу процесі еліміздің шығыс өңіріндегі оқу орнында жалғаспақ.
Дәулет Серікбаев атындағы Шығыс Қазақстан техникалық университетінің академиялық мәселелер жөніндегі проректоры Жадыра Қоңырбаева бұл оқуға ұмтылған жастар үшін зор мүмкіндік деген пікірде. «Мектеп түлектері мұндай жағдайда, біріншіден, қазіргі күні сұранысқа ие болып, соның ішінде сіздердің мұнайлы өңірлеріңіз үшін де маңызы зор саналатын техникалық мамандықтарды иеленеді, екіншіден, батыстан шығысқа қарай жол тартып, жаңа ортаны көреді, жаңа жостарды табады, білім көкжиегін кеңейтеді», - дейді Жадыра Түсіпханқызы.
ПІКІРЛЕР