Атырау университеті «Қазақстанның шетелдегі білім күндері» көрмесінде
Қазақстан Республикасы Білім және ғылым министрлігі мен Қазақстанның Өзбекстандағы дипломатиялық қызметтерінің қолдауымен "Халықаралық бағдарламалар орталығы" АҚ Ташкент қаласында 2021 жылдың 28 қарашасында ұйымдастырған «Қазақстанның шетелдегі білім күндері» атты білім көрмесіне Университеттің қызметкерлері қатысты. Көрме аясында талапкерлерге, ЖОО студенттеріне Университет туралы ақпарат берілді. Ата-аналар, мектеп директорының орынбасарлары, консалтингтік орталықтардың, Белоруссияның Software Development Company/iTechArt компаниясының өкілдері қызығушылық танытты.
Сонымен қатар, көрме аясында 29 қараша – 1 желтоқсан арасында Ташкент және Самарқанд қалаларында орналасқан Топ-1000 ЖОО-дарының қатарына кіретін, өзіндік тарихтары бар, 6000-нан 34000-ға дейін студенттерді қамтыған 6 жоғары оқу орнының ректорлары, проректорларымен және стратегиялық даму, халықаралық байланыс департаменттерінің қызметкерлерімен кездесіп, Университетті таныстырды.
Кездесу барысында білім алушылар, профессорлық-оқытушылар құрамының академиялық ұтқырлықтары, екі дипломдық білім беру және бірлескен білім беру бағдарламаларын әзірлеу, ғылыми тұрғыдағы байланыстар жайлы сұрақтар талқыланып, нәтижесінде Ташкент химия-технология институты, Өзбекстан мемлекеттік әлем тілдері университеті, А.Новаи атындағы Ташкент мемлекеттік өзбек тілі мен әдебиеті университеті, И.Каримов атындағы Ташкент техникалық университеті, Самарқанд мемлекеттік университеті, Самарқанд мемлекеттік экономика және сервис институттарымен екіжақты келісім-шарттарға қол қойылды.
ПІКІРЛЕР