Ұлағатты ұстаз Есет Қаженбайұлы атындағы дәрісхана ашылды
Х.Досмұхамедов атындағы Атырау университетінің дамуына және кәсіби мамандар дайындау ісіне зор үлес қосқан Ұлағатты ұстаз, Атырау қаласының және Исатай ауданының Құрметті азаматы, Құрмет, Еңбек Қызыл Ту, Құрмет Белгісі ордендерінің, Қазақ КСРы білім беру ісінің үздігі, Ы.Алтынсарин төс белгілерінің иегері Қаженбаев Есет Қаженбайұлының атына атаулы дәрісхананың ашылуына арналған салтанатты шарасы ұйымдастырылды.
Есет Қаженбайұлы университетімізде ашылған «География» мамандығының қалыптасуына, кадр даярлауда және география кафедрасының дамып өркендеуіне зор үлесін қосты. 1994 жылдан бері Х.Досмұхамедов атындағы Атырау мемлекеттік университетінің «география» кафедрасының аға оқытушысы, доценті, 2008 жылдан профессоры болып жұмыс жасаған. 20-дан астам оқулықтар мен оқу-әдістемелік құралдарын, оның ішінде тұңғыш жарық көрген «Атырау облысының географиясы» оқулығының авторы.
Аудиторияны ашу университет ректоры Саламат Нұрмұханұлына және Есет Қаженбайұлының немере інісі Бақберген Қасымұлына ұсынылды.
Бірінші оқу ғимаратында орналасқан аудитория оқу сабақтарын өткізуге және біртуар тұлғаның өмір жолы мен шығармашылығының түрлі кезеңдерімен таныстыруға арналған.
Алқалы жиынның алғашқы сөз кезегі Х.Досмұхамедов атындағы Атырау университетінің басқарма Төрағасы-Ректор Идрисов Саламат Нұрмұханұлына ұсынылды.
Басқосу барысында Есет Қаженбайұлымен облыстық мұғалімдер білімін жетілдіру институтында әріптес болған Шахман Нағимұлы, немере інісі Бақберген Қасымұлы сонымен қатар шәкірттері Болат Сандыбайұлы мен Қарамурзиева Жұмагүл және өзге де көрнекті тұлғалар мен ұлағатты ұстаздың жақындары сөз алды. Олар біртуар тұлғаның университет қабырғасындағы қызметі және ұстаз, азамат ретіндегі келбеті хақында ой-толғап, жылы естеліктерімен бөлісті. Жиында Есет Қаженбайұлының өмірі мен жүріп өткен жолына арналған «Ұстаз ұлағаты» атты бейнефильм көрсетілді.
Сонымен қатар шарада Есет Қаженбайұлы жайлы ұрпақтары дайындап, жарыққа шығарған «Білім мен ғылымдағы парасаты биік тұлға» атты естелік-кітабының тұсаукесер рәсімі өтті.
Салтанатты шара соңында ұлағатты ұстаздың қызы Айжан Есетқызы өзінің ризашылығын білдіріп, алғысын айтты.
ПІКІРЛЕР