Халықаралық шәкіртақы тағайындалды
Халел Досмұхамедов атындағы Атырау мемлекеттік университетінің бір топ студенттері Азербайжан Республикасының Тұңғыш Президенті Гейдар Алиев атындағы шәкіртақыға ие болды.
Оқудағы және қоғамдық жұмыстардағы белсенділігімен көзге түскен 5 студентке атаулы шәкіртақыны Қазақстанның Ақтау қаласындағы Азербайжан Республикасының Бас консулы Зейналов Эльхан Латиф оглы мен «Новруз» Азербайжан этномәдени қоғамдық бірлестігінің төрағасы Ахмедов Эльдар Мамед оглы арнайы келіп тапсырды.
Гейдар Алиев атындағы шәкіртақы дәстүрлі түрде 2012 жылдан бері Атырау университетінің үздік студенттеріне тағайындалып келеді. Сондай-ақ, көршілес екі елдің білім мен ғылым саласындағы байланыстары аясында Атырау университетінде Азербайжан тарихы мен мәдениеті орталығы ашылған болатын. Ақтау қаласындағы Азербайжан Республикасының Бас консулдығы мен Атыраудағы «Новруз» Азербайжан этномәдени қоғамдық бірлестігі осы игі істердің бәрінде мұрындық болып, қолдау көрсеткендігін атап өтеміз.
Жыл сайын Әзербайжан Республикасының Тұңғыш Президенті Гейдар Алиевтің туған күнінің қарсаңында тағайындалатын халықаралық шәкіртақыны ресми беру тапсыру 5 мамырда оқу орнының Азербайжан тарихы мен мәдениеті орталығында өтті. Іс-шараны университеттің оқу ісі бойынша проректоры Гүлжан Жарасова ашып, қонақтарға қош келдіңіздер айтып, білім мен ғылым саласындағы бірқатар оң өзгерістерді атап өтті. Кездесу үздік білім көрсетіп жүрген студенттерге аталмыш шәкіртақыны тапсыру салтанатына ұласты. Биылғы 6-шы тағайындалған халықаралық Азербайжан Республикасының Тұңғыш Президенті Гейдар Алиев атындағы шәкіртақыға биология мамандығынан Алтыбаева Дана, тарих мамандығынан Ертүгел Гүлдана, Мектепке дейінгі оқыту мен тәрбие мамандығынан Есқалиева Альбина, экономика мамандығынан Муфтахова Самал, математика мамандығынан Өтешқалиева Ғазиза сынды студенттер ие болды.
ПІКІРЛЕР