Теңдік Жауыров атындағы арнайы стипендия тағайындалды

Теңдік Жауыров атындағы арнайы стипендия тағайындалды

Университетіміздің 70 жылдық мерейтойына арналған іс-шаралар жоспары әлі де жалғасуда. Мерейтой аясында 30 атаулы аудитория мен 30 атаулы шәкіртақы тағайындауға байланысты кезекті шара Теңдік Жауыров атындағы атаулы шәкіртақы тағайындауға арналды.

 Осы ретте Журналистика кафедрасының ұйымдастыруымен арнайы қонақтар мен БАҚ өкілдерінің, университет ұжымының қатысуымен өткен салтанатты шараның модераторы кафедра меңгерушісі Мәншүк Мұқашева. Алғысөзді алған кафедра меңгерушісі Теңдік Жауыров туралы қысқаша шолу жасап, сөз кезегін Басқарма төрағасы-ректор Саламат Нұрмұханұлына ұсынды. Университетіміздің ректоры тағылымы мен өнегесі мол тұлғалардың өшпес ізі университет қабырғасында мәңгілік жаңғыратыны әрі болашақ ұрпаққа дәріптелуі міндетті екендігін айтып өтті.

Құрмет орденінің иегері, Республикаға танымал мәдениет қайраткері, ғалымның бауыры Орақ Жауыров Журналистика мамандығының 3 курс студенті Қасиет Бахкерейқызына атаулы стипендияны табыстады. Табыстау барысында студентімізге ғалымның ізін жалғап, елге белгілі танымал білікті журналист болуына тілек білдірді. Қасиет те ғалымның жанұясы мен кафедра ұжымына, меңгерушісіне ерекше алғысын білдіріп, аталмыш тақырыпта шағын видеослайдты көрермендер назарына ұсынды.

 Арнайы шақыртылған қонақтар арасынан сөз алғандар қатарында «Атырау» газетінің бас редакторы Назарбек Қосшиев, "Ақ жол" партиясы Атырау облыстық филиалының саяси кеңесшісі Төлеуішов Әбілхан Сейтімұлы және университетіміздің ғалымы, «Мәңгілік ел» ғылыми-зерттеу орталығының директоры Аққали Ахмет өздерінің жүрекжарды пікірлерін білдіріп, осындай игі дәстүр жалғасын таба берсе деген игі ниеттерін жеткізді.

Шара соңында кафедра меңгерушісі Мәншүк Мұқашева ғалымның жанұясы, арнай қонақтар мен қатысушыларға шексіз алғысын білдіріп, стипендия иегеріне сәттілік пен табысқа толы қадамдар тіледі. 

ПІКІРЛЕР

Тізімге қайта оралу

Тарихқа тағзым

17 Сен 2021 29