Табиғатты қорғау – ортақ міндет
13 мамырда Х.Досмұхамедов атындағы Атырау университетінің «Жайық» мәдени-спорт кешенінде табиғатты қорғау және экология мәселелері бойынша Атырау облыстық мәслихаты депутаттары, құзыретті мекемелердің, табиғат пайдаланушы компаниялардың, табиғат жанашырларының қатысуымен «Экология және табиғатты пайдалану мәселелері туралы» тақырыбында дөңгелек үстел өтті.
Әрбір адам үшін қоршаған ортаның қауіпсіздігі маңызды. Еліміздің Ата Заңында да «Мемлекет адамның өмір сүруі мен денсаулығына қолайлы айналадағы ортаны қорғауды мақсат етіп қояды» деп көрсетілген. Табиғат пен қоршаған ортаны сақтау тек мемлекеттің ғана емес, сонымен қатар азаматтардың да міндеті. Адамның қолайлы қоршаған ортаға құқығы түрлі заңдар мен нормативтік актілерде бекітілген. Мемлекет басшысы да бұл мәселеге үнемі назар аударып отырады, мысалы «Жаңа жағдайдағы Қазақстан: іс-қимыл кезеңі» Жолдауында «Қоршаған ортаны қорғау және экологиялық даму – еліміз үшін алдыңғы кезекте тұрған мәселе. Бүкіл өркениетті әлем жұртшылығы осы мәселемен айналысуда. Бізге де мұндай жаппай үрдістен шет қалуға болмайды»,- деген болатын. Атырау өңірінің экологиялық мәселелері жылдан-жылға табиғат жанашырларын алаңдатып отыр. Біздің еліміз 1992 жылы Біріккен Ұлттар Ұйымының Бразилияда өткен конференциясында қоршаған ортаны дамыту бойынша қабылданған Рио-де-Жанейро Декларациясына қосылды. Басты мақсат еліміздің табиғат байлығын болашағымыз үшін сақтау, адамдарға өмір сүруге қолайлы табиғи ортаны қорғау болып табылады.
Осындай жанайқайға толы кездесу барысында адамдардың қолайлы қоршаған ортаны, туған жерімсіздің экологиясын қорғау бойынша сөз қозғалды.
Кездесуге Атырау облыстық мәслихатының хатшысы Әлібек Ибатоллаұлы Нәутиев, Атырау облыстық мәслихатының «Экология, табиғатты пайдалану және аграрлық мәселелер жөніндегі тұрақты комиссиясы» мүшелері, өңіріміздегі экологиялық ахуал жайында экологиялық мәселелермен тығыз айналысып жүрген қоғам белсенділері қатысып, баяндама жасап, өз ұсыныстары мен пікірлерін білдірді.
Эпидемиологиялық жағдайға байланысты онлайн форматта ұйымдастырылған дөңгелек үстелге ZOOM платформасындағы қатысушылар тарапынан да сұрақтар қойылып, тұшымды жауаптар алынды.
Жиында қоғамды толғандырып жүрген экологиялық мәселелер бойынша әр тараптың пікірлері тыңдалып, ашық ойлар айтылды. Табиғатты қорғау баршамыздың міндетіміз. Сондықтан жергілікті басқару органдары, мәслихат депутаттары, құзырлы мекеме басшылары да айтылған ұсыныстар мен пікірлерді ескерусіз қалдырмайды деген сеніммен экология төңірегіндегі кездесу аяқталды.
ПІКІРЛЕР