Университет ғылымының көкжиегі
Мемлекет басшысы Қасым–жомарт Кемелұлы Тоқаев «Тәуелсіздік бәрінен қымбат» атты мемлекеттік бағдарламалық мақаласында «Азаттығымыздың айшықты белесіне шыққанда әрбір саналы азаматты «Отыз жылда біз қандай жетістіктерге жеттік?», «Келер ұрпаққа қандай елді аманаттаймыз?», «Мемлекеттігімізді нығайта түсу үшін тағы не істейміз?» деген сауалдар толғандырары анық. Осы тұрғыдан алғанда, бұл – арман-мақсаттарымызды тоғыстырып, болашаққа тың серпінмен қадам басу үшін өткенге тағы бір мәрте оралатын, жетістіктеріміз бен кемшіліктерімізді ой елегінен өткізетін маңызды мезет» деп көрсеткен еді. Тәуелсіздік, тарихтың жаңа белесі. Бұл ақиқат. Жаңа белес немесе ұлттық тарихтың жаңаша жазбасын өзіміз, яғни кәсіби тарихшылар жазарымыз анық. Өлкедегі жоғары оқу орны көшбасшысы, Халел Досмұхамедов атындағы Атырау университетінің қазіргі басшылық, ғылыми педагогикалық жоғары әлеуеті 1990 жылдары қалыптасты. Оны архив деректері де негіздейді. Негізгісі естелік материалдар.
1993 жылы ғылыми жұмыстар проректоры, профессор Асхат Сәлімұлы Иманғалиевтың ұсынысымен: тарих, педагогика, философия және биология мамандықтары бойынша аспирантура ашылды. 1995-2000 жылдары арасында аспирантура түлектері Б.Аташев – философия, А.Мұқамбетжанова – педагогика мамандықтары бойынша ғылым кандидаттары атанды.
1997 жылы университет «Каспий өңірі жоғары оқу орындары кеңістігіне» кірді. Бұл үлкен жетістік болатын. Бұл жұмыста ректор Хисмет Табылдиев еңбегі ерекше еді. 1990 жылдары университет ғылыми бөлімінде Атыраулық алғашқы докторлар Хисмет Табылдиев, Асхат Иманғалиев, Қадыржан Сейталиев, Қадыр Жүсіпов, Үркенбай Қыдыралин, Самиғолла Хамиев сияқты ғалымдармен толықты. Ғылымның негізгі орталығын мен, Лесқали Базарғалиұлы өзім де осы ортаны толықтырып ғылым докторы атансам да, асыл ағаларымның істеріне куә болдым. 2000 жылдары университет ғылымын басқарған Ғизат Имашев, Әбілсейіт Қапизұлы Мұқтар, Жәмиға Тәжікқызы Таңатарова, Саламат Нұрмұханұлы Идрисов кәсіби білімі жоғары, ғалымдар болатын. Әбілсейіт Қапизұлы «Сарайшық» тарихи мәдени музей қорығын басқарса да оқу орнына туған кафедрасына деген ықыласы ерекше. Қазірде, Саламат Нұрмұханұлы жетекшілігімен, ғалымдар «ішкі ғылыми жобалар» бойынша еңбек етуде. Кәсіби мамандар даярлауда, алдыңғы толқын ағалар салған сара жол - әрқашан жетістік негізі деп ойлаймын.
Лесқали Базарғалиұлы Бердіғожин
тарих ғылымданының докторы, профессор
«Қазақстан және дүниежүзі тарихы кафедрасы» меңгерушісі
ПІКІРЛЕР