Х.Досмұхамедов атындағы университетінде түлектерді жұмысқа орналастыру жәрмеңкесі өтті

Шараның ашылу барысында университеттің оқу ісі жөніндегі проректоры Гүлжан Жарасова сөз сөйлеп, жастардың еңбек жолының сәтті басталуына тілектестігін білдірді.

– Университет ұжымының алдындағы басты мақсат – кәсіби мамандар даярлап шығару. Қазіргі таңда білім, біліктілік талаптарына сәйкес жастардың қызметке орналасуына, тәжірибеден өтуіне біраз  мекеме, кәсіпорындар келісім берді. Бүгінгі жәрмеңке түлектерге таптырмас мүмкіндік боларына сенемін, – деді ол.

– «Жәрмеңкеге  барлығы 125 жұмыс беруші мекеме қатысты. Биыл университетті күндізгі бөлімде оқитын 679 студент бітіреді. Педагогикалық мамандықтарды бітіргелі отырған 250 студенттің 100-і қазірдің өзінде мемлекеттік педагогикалық тәжірибеден өту нәтижесінде жұмысқа қабылданған. Ал, «Жас маман-2017» жәрмеңкесі нәтижесінде тағы 62 бітіруші түлекті жұмысқа орналастыруға мүмкіндік туды. Сондықтан, студенттердің жұмысқа орналасу жәрмеңкесін жыл сайын өткізіп келеміз. Биыл жәрмеңкені жеке-жеке факультетке бөліп емес, түрлі мамандықтарды біріктіріп кең көлемде ұйымдастырдық» деді университеттің құзыреттілік және мансапты жоспарлау орталығының директоры Данагүл Баймашева.

Жалпы жәрмеңкеде математика, физика, информатика, химия, орыс тілі мен әдебиеті, орыс тілінде оқытпайтын мектептердегі орыс тілі мен әдебиеті, дефектология, музыкалық білім, бейнелеу өнері және сызу, дене шынықтыру және спорт мамандықтарына сұраныстың жоғары екендігі байқалды.

Соңғы жылдары түлектердің мамандығына сай қызметке орналасуына мүмкіндік жасалып жатыр. Осындай игі шараны ұйымдастырушы ұжымдарға алғыс білдіремін, – деді журналистика мамандығының студенті Әсем Сырғабаева.

Тізімге қайта оралу