01.07.2019 408

Байланыс және ақпарат қызметкерлері күніне орай Атырауда «Қазақстан» республикалық телерадиокорпорациясы» АҚ Атырау облыстық филиалына қарасты «Atyraý radiosy»-ның жаңа радиостудиясы ашылып, жаңа радиотаратқышы іске қосылды.

Медиа аудитория Х.Досмұхамедов атындағы Атырау мемлекеттік университетімен бірлескен жоба аясында жүзеге асып отыр. Университеттің  журналистика кафедрасының  меңгерушісі, қауымдастырылған  профессор  Мәншүк Тынышқалиқызы:

– «Кәсіби мерекемізбен тұспа тұс келіп жатқан маңызды шарада бас қосып тұрмыз. Телеарна ішінен ашылып жатқан медиа аудитория болашақ теле журналистер  дайындауға маңызы зор.  Бүгінде  білімді ғылыммен, тәжірибемен ұштастыру талабы  қойылып отыр. Бірлескен жобамыз еліміздегі дуалды білім беру жүйесіне қосқан үлесіміз болмақ. Телеарнаның кәсіби мамандарынан білімдерін жетілдіріп, кәсіби өсуге қадам басады», - деп белгілі ғалым телеарна ұжымының жұмысына сәттілік тіледі.

Іс-шара аясында «Қазақстан» РТРК» АҚ Атырау облыстық филиалының 5 қызметкері: «Atyraý radiosy» аға редакторы Слухия Қаттарқызы, редакторлар Гүлназ Кәрімжан, Айнагүл Қонысқалиқызы, Шолпан Абатқызы,  Индира Мерекенқызы журналистика ардагерлері қолынан Қазақстан журналистер одағы сыйлығының иегері атағымен марапатталды. Айтулы марапат «Atyraý radiosy»-ның 80 жылдығы мен Қазақстан журналистер одағының 60 жылдық мерейтойы құрметіне орай берілді.

«Қазақстан» республикалық телерадиокорпорациясы» АҚ Атырау облыстық филиалына қарасты «Atyraý radiosy»-ның тарихы 1938 жылы Гурьев облысының құрылуынан бастау алады. 1938 жылдың 2-ші наурызында алғаш рет радио хабары эфирге шықты.  Қазір ол 102.0 FM жиілігінде тәулігіне 17 сағат хабар таратып отыр.

https://egemen.kz/article/203508-atyra%C3%BD-radiosy-nynh-dganha-radiostudiyasy-ashyldy#.XRgZBkZqoEQ.whatsapp

Тізімге қайта оралу