Баспасөз хабарламасы

Елбасының «Болашаққа бағдар: рухани жаңғыру» бағдарламасы негізінде мемлекетімізде көптеген жұмыстар атқарылып жатырғаны баршамызға аян. Солардың бірі де бірегейі «Жаңа гуманитарлық білім. Қазақ тіліндегі 100 оқулық» жобасының іске асуы. Еліміздегі гуманитарлық ғылымның, соның ішінде оларды оқытудың деңгейін көтеру, әлемдік үлгілерге негіздеу мақсатында әлемдегі жүз үздік гуманитарлық бағыттағы оқулықты қазақ тіліне аудару еді. Аталған жоба аясында 2018 жылдың 14-24 маусым аралығында университетіміздің ғылыми кітапханасында «Білім сапасының жетістігі - жаңа оқулық»  онкүндігі өткізіледі.

Бұл шараның негізгі мақсаты – болашақ мамандардың, жастардың әлемдік деңгейдегі бәсекеге қабілеттілігі мен білімін арттыру және мемлекеттік тілге аударылған оқулықтардың мазмұны мен маңызын талқылап, ел арасына кеңінен насихаттау. Осындай игі шараны жүзеге асыру үшін университеттің басшылары мен профессор-оқытушыларын қатыстыра отырып, олардың жоба аясындағы өзіндік пікірлері мен қазақ тіліне аударылып отырған тарих, саясаттану, әлеуметтану, философия, мәдениеттану, психология және филология ғылымдары саласындағы кітаптардың құндылықтарын жария ету.

Елбасының қолдауымен үздік шетел оқулықтарын ағылшын, француз тілінен тікелей қазақ тіліне аудару ХХІ ғасырдың таңғаларлық жаңалығы десек болады. Аталған және болашақта қазақшаға аударылуға белгіленіп, таңдалып отырған оқулықтар еліміздің оқу орындарында бұрын қолданылып жүрген бір қалыптан айнымайтын оқулықтардың мазмұнындағы тереңдігі жетіспей жатқан ғылыми тұжырымдарды жетілдіріп, түбегейлі жаңартып, жаңа мазмұнмен молайтатыны сөзсіз.

Осынау жаһандану заманында ұлттық санамыздың жаңғыруына мүмкіндік берген Елбасының сарабдал саясаты мен ұлт жолындағы ұстанымдары бүгінгі жастарымыз бен келешек ұрпағымыздың бәсекеге қабілеттіліктерін арттырып, әлемдік білім кеңістігіне сай білім алуына айқара жол ашады деп сенеміз.

Ғылыми кітапхана

Тізімге қайта оралу