2022 жылдың 23 қарашасында Қазақстан Республикасы Мемлекеттік қызмет істері агенттігінің Атырау облысы бойынша департаментімен Х.Досмұхамедов атындағы Атырау университетінің Экономика және құқық, Инновациялық білім беру факультеттері бірлесіп, «Мемлекеттік қызмет мектебі» аясында студенттермен кездесу ұйымдастырды. «Жас мемлекеттік қызметші мектебі – жастар үшін жаңа мүмкіндік» деп аталатын кездесудің басты мақсаты - көшбасшылық қасиеттерге ие, құзіретті, стратегиялық және инновациялық міндеттерді шешуде ынталы мемлекеттік қызметшілерді қалыптастыру. ҚР Мемлекеттік қызмет істері агенттігінің Атырау облысы бойынша департаментінің басшысы, Әдеп жөніндегі кеңес төрағасы Ерлан Мейрамханұлы Ермаханбетов жоғарыда аталған факультеттердің бітіруші түлектерімен ашық, еркін форматта кездесу өткізіп, Жаңа Қазақстанның дамуына ықпал ететін, мемлекеттік қызметшілердің болашақ буынын қалыптастыру мақсатында ортақ міндеттерді бірлесіп шешуге шақырды. Ол үшін болашақ мемлекеттік қызмет саласындағы жас мамандарға мектеп қызметін таныстырып, дәріс өткізуге, оқыту және қайта даярлау жұмыстарын жандандыруға, мемлекеттік қызметке дайындау дағдыларын үйренуге қолдау көрсетілетіндігі айтылды. Аталған шараға Ерлан Мейрамханұлымен қатар, Атырау университетінің Әлеуметтік мәселелер және жастар саясаты жөніндегі проректоры, п.ғ.к. Қойшығұлова Л.Е., Экономика және құқық факультетінің деканы, э.ғ.к. Адиетова Э.М., Менеджмент кафедрасының меңгерушісі, п.ғ.к. Уталиева Р.С. қатысты.
Осы кездесу барысында Мемлекеттік қызмет мектебінде кез-келген білім бағдарламасының студенттері қатысып, білімдерін жетілдіріп, сертификатқа ие болатындығы айтылды. Студенттер тарапынан Ерлан Мейрамханұлына өздерін толғандырған сұрақтары қойылып, жауаптар алынды. Алдағы уақытта тараптар аталған мазмұндағы кездесулерді жиі өткізу туралы уағдаластыққа келді.
Экономика және құқық факультеті
«Мемлекеттік қызмет мектебі»
ПІКІРЛЕР