05.04.2024 176

Бүгін Х.Досмұхамедов атындағы Атырау университетінің Ғылыми кеңес залында 12 сәуір Ғылым қызметкерлері күніне орай «Жастар және ғылым: бүгіні мен болашағы» атты Жас ғалымдардың халықаралық ғылыми-практикалық конференциясының пленарлық мәжілісі өтті. Биылғы конференцияның ерекшелігі Қазақ КСР Ғылым Академиясын ұйымдастырушы және оның тұңғыш президенті, Қазақ КСР Ғылым Академиясының академигі, Кеңес Одағы мен Қазақстанның металлогения мектебінің негізін қалаушы, қазақтың тұңғыш академигі Қаныш Сәтбаевтың туғанына 125 жыл толуына орай ұйымдастырылды. Мәжілістің негізгі мақсаты – мемлекет пен қоғам дамуына айқын қызмет ететін, жасампаз, заманауи тұрғыда ойлай алатын жас ғалымдарды біріктіру, олардың диалог алаңын құру және ғылыммен айналысатын жастардың қатарын көбейтіп, жас ғалымдармен пікір алмасу. Аталмыш конференцияға университет басқарма төрағасы-ректор Саламат Идрисов, Ғылым және халықаралық қатынастар жөніндегі проректор Қансұлу Өтепқалиева және факультет декандары, профессор-оқытушылар құрамы мен магистранттар және студенттер қатысты. Іс-шара университет басқарма төрағасы-ректор Саламат Идрисовтың құттықтау сөзімен ашылды. Конференцияның маңыздылығына кеңінен тоқталып, университеттегі жас ғалымдардың жұмысы мен еңбегі орасан зор екендігін айқындай түсті. «Жастар қоғамның қозғаушы күші. Әсіресе ғылымда жастардың қолтаңбалары болып, олар жаңашыл тың идеяларды ұсынғандары көңіл қуантады. Университемізде де жас ғалымдарға ерекше қолдау көрсетілген. «Жастар және ғылым: бүгіні мен болашағы» атты Жас ғалымдардың халықаралық ғылыми-практикалық конференциясының пленарлық мәжілісі мен секцияда ғылыми тақырыптар жан жақты талқыланып, еліміздің ғылымын дамытудағы жұғымды ой-пікірлер, ұсыныстар түседі деп сенемін. Бүгінгі конференцияның маңыздылығы мен құндылығына дәлелі онлайн форматта қатысып отырған шетелдік әріптестерімізді айтуға болады. Барша қатысушылардың баяндамалары арқылы келелі жұмыстар атқарылады деп ойлаймын. Сонымен қатар секцияда да қозғалатын өзекті тақырыптар өз нәтижесін береді деп сенемін»,-деген университет ректоры қатысушыларға сәттілік тілеп, ризашылығын білдірді. Модератор Қансұлу Өтепқалиеваның айтуынша 2023 жылғы студенттердің ғылыми-зерттеу жұмыстары байқауының нәтижесі бойынша Атырау университеті екі бағыт бойынша яғни «орыс тілі мен әдебиеті» және «психология» білім бағдарламасымен бірінші орын иеленген. Соның нәтижесінде 2024 жылдың республикалық байқауы университет базасында өтетін қуанышпен хабарлады. Содан соң аталмыш байқауда университет намысын қорғаған жүлдегерлерді университет ректоры марапаттап, Алғыс хат пен қаржылай сертификаттар табыстады. Атап айтсақ, «Орыс тілінде оқытпайтын мектептердегі орыс тілі мен әдебиеті» мамандығының 3 курс студенті Нурикамал Қылышбек жүлделі 1 орын иеленіп, қаржылай сертификат иеленсе, ғылыми жетекшісі профессор Жарқын Есеноваға Алғыс хат табысталды. Сондай-ақ екінші орын иеленген «Психология» білім бағдарламасының 4 курс студенті Ұлмекен Имашеваның ғылыми жетекшісі PhD Қарас Қазиевке Алғыс хат беріліп, сертификатпен марапатталды. Кейін пленарлық мәжілісте қатысушылар өзекті тақырыптарды көтеріп, баяндама жасады. Астана қаласынан онлайн қатысқан Ұлыс Жошыны зерттеу ғылыми институтының директоры, PhD Жақсылық Сәбитов «Қазақ тайпаларының этногенетикалық тарихы» тақырыбында баяндады. «ХХ ғасырдың екінші жартысындағы Жанғар эпосын бекіту: Қалмақ дербет жанғаршы мысалында» тақырыбында Қалмақ Республикасынан «Қалмақ әдебиеті және журналистика» кафедрасының доценті, PhD, Қалмақ филологиясы және Шығыстану институты, ҚалмМУ, «Ойрад судлал» (Ойратану) СҒБ тәлімгері Мерген Босхомджиев баяндама жасады. Мұхаммед Әл - Хорезмий атындағы Ташкент Ақпараттық технологиялар университетінің «Ақпараттық технологиялар» кафедрасының доценті, PhD Тимур Худайбергенов өз баяндамасында «Өзбекстандағы ғылыми-практикалық жобалар мен гранттар, бірлескен жұмыс мүмкіндіктері» туралы ой қозғады. Тринити колледжінің постдокторанты, PhD Қуаныш Жусупбеков «Сканерлеуші туннельдік микроскопия және қабатты материалдардың спектроскопиясы» тақырыбында кеңінен тарқатса, Экономикалық және статистикалық зерттеулер жөніндегі Еуропалық орталығының PhD, кандидаты Жанар Қоныс «Ұлыбританиядағы жалақы төлеудегі гендерлік алшақтыққа некенің әсері» туралы баяндама оқыды. Х. Досмұхамедова атындағы Атырау университетінің «Физика және техникалық пәндер» кафедрасының қауымдастырылған профессоры, PhD Гүлдана Бекова «Бүгінгі күн – кешегінің жемісі, ертеңгінің өркені: ғылымдағы жастардың рөлі»туралы ой өрбітті және Мәдениеттану магистранты Нурай Явуз «Магистрлік зерттеу барысында Атыраудың маған берген мүмкіндіктері»жөнінде баяндады. Сонымен қатар баяндамашылардың ішінде студенттер де табылды. Олар студенттерге қызықты да өзекті тақырыптар туралы ой өрбітті. Б.Б. Городовиков атындағы Қалмақ мемлекеттік университетінің «Шетел филологиясы» 4 курс студенті Мария Ахмад «Жанғар эпосының желілік Шығыстану жинақтарындағы жарияланымдарға шолу» туралы айтса, Х.Досмұхамедов атындағы Атырау университетінің «Құқықтану» мамандығының 3 курс студенті Жәңгір Темірханов «Жауапкершілігі бар азамат-әділетті Қазақстан екінші республиканың тұжырымдамасы ретінде» өз баяндамасын жүргізді. Пленарлық конференция секция жұмысымен жалғасын тапты. Мәжілісте жаратылыстану, физика-математикалық және техникалық,әлеуметтік-гуманитарлық, экономикалық және құқық ғылымдары, педагогикалық ғылымдар саласына қатысты секциялар жұмыс істеп, баяндамалар жасалып, талқылаулар болады. Аталмыш жиында «Мәдениетаралық коммуникациядағы инновациялық технологиялар мен тәсілдер», «Физика – математика ғылымдары мен АКТ – ның заманауи мәселелері»,«Гуманитарлық ғылымдар және өнер саласындағы жаңа тенденциялар», «Жаңа Қазақстанның экономикалық бағдары»,«Әділетті Қазақстан-Адал азамат: құқықтық сана мен құқықтық сауаттылықты қалыптастырудың жаңа бағыт-бағдары ретінде»,«Заманауи педагогика және психологияның парадигмасы - жастардың көзімен» және «Жаратылыстану ғылымдарының қазіргі заманғы өзекті мәселелері» тақырыптары бойынша ой қозғалды. Сонымен қатар секцияға онлайн және оффлайн режимде көптеген ғалымдар қатысты. Ғылым адамзат тіршілігінің барлық саласын дамытудың басты факторына айналды. Сондықтан ғылым қоғамдағы стратегиялық маңызды бағыт, ғылымның дамуы мемлекеттің экономикалық дамуының көрсеткіші болып саналады. Конференция өз мақсатын сәтті орындап, ой пікірлері бір арнада тоғысқан жас ғалымдар тың ұсыныстары мен пікірлерін ортаға салып, тәжірибе алмасты.

Тізімге қайта оралу